कलेजतपाखें उत्कृष्ट विद्यार्थी तानातान

येँ(सन्ध्या टाइम्स)/एसएलसीया रिजल्ट वयेसातकि उत्कृष्ट जूपिं विद्यार्थीतय्त थःथाय् सालेगु लागिं थनया प्लस टु कलेजतय् दथुइ थुलि धेंधेंबल्लाः जुइ कि आः उकिं हद हे पार याना वंगु आभास अभिभावकतय्सं याना हःगु दु।
अप्वः नम्बर हःपिं विद्यार्थीतय्सं थःगु कलेज ज्वाइन यात धकाः मेपिं विद्यार्थीत सालेगु लागिं थ्व कलेजतय्सं मखु मखुगु विज्ञपन समेत पत्रपत्रिकाय् छापे याकाच्वंगु दु धइगु खँ थौं 'अन्नपूर्ण पोष्ट' न्हिपती छापे जूगु निगू विज्ञापन जक स्वःसां गाः। उगु पत्रिकाय् थौं पिहां वःगु विज्ञापनत मध्ये नासा कलेज व अरनिको इन्टरनेशनल एकेदमि नांगु कलेजया विज्ञापनय् थःगु स्कूलय् भर्ना जूवःपिं विद्यार्थी धकाः छम्ह हे विद्यार्थीया फोटो छापे याना तःगु दु। ख्वपया बाल विद्या बोर्डिंग स्कूलं ९२.६२५ प्रतिशत ल्याः हयाः पास जूम्ह वृहतरत्न वज्राचार्य नांयाम्ह विद्यार्थीया फोटो निगुलिं कलेजतय्सं थःथःपिनि विज्ञापनय् छापे यानातःगु दु। छम्ह हे विद्यार्थीया फोटो निगू निगू कलेजं छापे याःगुलिं उमि दथुइ गुलि अस्वस्थ धेंधेंबल्लाः जुयाच्वंगु दु धइगु खँ अथें हे प्रस्ट जूगु खँ अभिभावकतय्सं धाःगु दु।
उम्ह विद्यार्थीया नां निगू कलेजं छापे याःसां व धाथें छु कलेजय् भर्ना जुल धइगु खँ धाःसा सी मदुनि। थौंकन्हय् कलेजतय्सं उत्कृष्ण विद्यार्थीतय्त थःथाय् भर्ना मजूसां कलेज जकसां निरीक्षण याना बिउ धकाः सःतः वयाच्वनी।