'भदौ १४ लिपा तःधंगु खतरा'

येँ(सन्ध्या टाइम्स)/भौतिक योजना तथा निर्माण मन्त्री टोप बहादुर रायमाझीं दलत गम्भीर मजुल धाःसा मुलुक अधिनायकवादी शक्तिया ल्हातय् वनीगु दावी यानादीगु दु।
मन्त्रीनिवास पूच्वय् थौं सुथय् आकाभाकां पत्रकारत सःताः खँ ल्हासें मन्त्री रायमाझीं थ्व खँ धयादीगु खः। वय्कलं वइगु भदौ १४ गते न्ह्यः हे राष्ट्रिय सहमति मजुल धाःसा अनं लिपा मुलुकय् अधिनायकवादी शासन लादे जुइगु ख्याच्वः नं बियादिल। 'दलत गम्भीर जुयाः मवन धाःसा दक्षिणपन्थी शक्तिं राष्ट्रपतियात न्ह्यःने तयाः अधिनायकवादी शासन लादे याइगु खतरा दु' धयादिसें मन्त्री रायमाझीं उकियात पनेगु नितिं राष्ट्रिय सहमतिया विकल्प मदु धकाः नं स्पष्ट यानादिल। वय्कलं मन्त्री मन्त्री दथुइ विवादया कारणं मन्त्रालयपाखें ज्या अःपुक याये मफयाच्वंगु खँ नं स्वीकार यानादिल।
राष्ट्रिय सहमतिया विकल्प मदुगु खँय् बः बिसें वय्कलं उकिया अभावय् सरकारं थःगु मिसन पूरा यायेत सफल जुइ मफयाच्वंगु जिकिर यानादिल। दलतय् दथुइ संविधानसभाया म्याद थप याये न्ह्यः वंगु जेठ १४ गते जूगु सहमतियात याकनं हे पालना यायेमाः धयादिसें दलतय्सं सहमति यायेगु तर पालना यायेगु ज्या ल्वःमंका वनाच्वन धकाः टिप्पणी तकं यानादिल।
एकीकृत माओवादीया स्थायी समितिया दुजः नं जुयादीम्ह मन्त्री रायमाझीं थःगु पार्टी दुने खने दुगु आन्तरिक विवादं शान्ति प्रक्रिया व संविधान निर्माणया ज्याय् पंगः थनी मखु धकाः दावी यानादिल।
२०,००० फाइलय् हस्ताक्षर
मन्त्री रायमझीं आः वइगु दँय् देय्या थीथी थासय् भौतिक निर्माणया ज्या न्ह्याकेगु लागिं थम्हं आः तकया दुने २०,००० गू फाइलय् सही यायेधुनागु जानकारी नं बियादिल। थम्हं सही यानागु थ्व फाइल मध्ये ग्वःगू कार्यान्वयन जुइ थम्हं मसिउ धासें वय्कलं धयादिल, 'प्रधानमन्त्री, अर्थमन्त्री व राष्ट्रिय योजना आयोगया उपाध्यक्ष मेमेगु हे पार्टीयापिं जूगु कारणं जितः मन्त्रालयय् ज्या यायेत थाकुयाच्वंगु दु।'
भौतिक योजनाया ज्या यायेत थुगुसी थःगु मन्त्रालययात प्यंगू अर्बया बजेट वइगु सम्भावना दुगु खँ नं वय्कलं कनादिल।