"प्रेम मोहन सिरपाः"या घोषणा

नेपालभाषा साहित्य विधाय् नाटक व उपन्यासयात च्वन्ह्याकेगु ताः तयाः थौं छगू ज्याझ्वःया दथुइ "प्रेम मोहन सिरपाः"या घोषणा जुल ।

प्रेम मोहन सिरपाः गुथिया नायः बाखंच्वमि राजा शाक्यं नाय्िखं च्वयेके कथं भुस्याः थानाः थुगु सिरपाःया घोषणा यानादीगु खः । वय्कःया हे सभाध्यक्षताय् न्ह्याःगु उगु ज्याझ्वलय् नेपालभाषा एकेदमिया चान्सलर नापं संस्कृतविद् सत्यमोहन जोशीजुं त्वाःदेवाय् मत च्याकाः ज्याझ्वःया उलेज्या यानादीगु खःसा सिरपाःया दाता ई. मोहनकृष्ण डंगोलं च्वयादीगु न्हूगु उपन्यास "विधि हे विपरित जुसेंलि" सफू नं पितब्वज्या यानादीगु खः ।

ज्याझ्वलय् नाटकया विषययात कयाः प्रा. प्रेमशान्ति तुलाधर व उपन्यास विषययात कयाः प्रा. माणिकलाल श्रेष्ठं विशेष न्वचु बियादीगु खः । अथेहे च्वमि नापं सिरपाःया दाता ई. मोहनकृष्ण डंगोलं थः गुरु भाषा निभाः प्रेमबहादुर कसाःया हःपालं थःम्हं नेपालभाषाया नाटक च्वयागु व दबुली क्यनागु खँ न्ह्यथनादिसें थ्वहे गुणयात लुमंकाः वय्कःया हे नामय् थःगु नं नां स्वानाः सिरपाः नीस्वनागु खँ कनादिल ।

सिरपाः गुथिया दुजः लक्ष्मण राजवंशीं लसकुस यानादीगु उगु ज्याझ्वलय् व्यवस्थापक मय्जु रेणुका बासुकलां सुभाय् देछानादीगु खः ।

थौं घोषणा जूगु सिरपाः कथं निदँय् छक्व नाटक वा उपन्यासयात न्यय्द्वःतका सिरपाः बीगु उगु ज्याझ्वलय् जानकारी बिउगु दु ।

More Stories Like this