ल्हाकातःगु तिसा
येँ/हनुमानध्वाखा दरवार दुने गद्दी बैठक व मसानचोक दथुइ च्वंगु कँडेल भगवती देगः लिउनेया ब्व जीर्णोद्धार यायेत चा चीका च्वंबलय् म्हिगः पुलांपुलांगु लुँ व वहःयागु तिसा व ध्यबा तयातःगु स्वंगः शेफ व छगः सिजःया सन्दू लुया वःगु दु। उकी मध्ये छगः शेफ व छगः सन्दूपाखें साढे ३ किलो लुँ, ९५ किलो वहः व पुलांगु ध्यबा १५ किलो लुया वःगु खः। थ्व ज्वलं स्वंगः ट्यांकाय् लाहाछाप समेत तयाः शार्दूलजंग गुल्मया गुल्मपति सेनानी लालबहादुर भुजेलया जिम्माय् बिउगु खः। अनुकुल इलय् मेगु निगः शेफ नं चायेकाः अनं लुया वःगु ज्वलं सार्वजनिक याइ धाःगु दु।
