खनाल व प्रचण्डया दथुइ भेटवार्ता
येँ(सन्ध्या टाइम्स)/प्रधानमन्त्री झलनाथ खनाल व माओवादी अध्यक्ष प्रचण्ड दथुइ शान्ति प्रक्रिया व संविधान निर्माणया ज्यायात तिब्रता बीगु बारे सहलह जूगु दु। प्रधानमन्त्री निवास बालुवाटारय् थौं सुथय् बाघौ ति जूगु सहलहया झ्वलय् जेठ १४ गते जूगु न्यागू बुँदाया सहमति कार्यान्वयनया नितिं न्हापां दकलय् न्ह्यःनेया निगू बुँदाया कार्यान्वयनया नितिं निम्ह नेतातय् दथुइ सहलह जूगु खँ प्रधानमन्त्रीया प्रेस सल्लाहकार सूर्य थापां जानकारी बियादीगु दु।
वय्कःपिनि दथुइ आः खने दयाच्वंगु अन्यौलता चीकेगु, शान्ति प्रक्रियायात तिब्रता बीगु व फुक्कसिगु सहमति कथं बजेट हयेगु खँ जूगु खः। प्रचण्डं पार्टी दुने जुयाच्वंगु अन्तरविरोधं छुं नं समस्या वइ मखु धयादीगु खः।
निगू बुँदा कार्यान्वयन धुंकाः जक प्रधानमन्त्रीया राजीनामाया खँ जुइ धकाः तकं सहलह जूगु खः।
