छम्ह कर्मचारी अपहरण मेम्ह बेपत्ता

येँ(सन्ध्या टाइम्स)/ल्वाभः ज्वना वःपिं अज्ञात मनूतय्सं वंगु चान्हय् कृषि विकास कार्यालय सिराहाया कर्मचारी हरिशचन्द्र पण्डितयात अपहरण याना यंकूगु दुसा मेखे कञ्चनपुरया महाकाली पारी च्वंगु दोघारा गाविसया कार्यालय सहयोगी तुलाबहादुर बोकटी बेपत्ता जूगु दु।
सिराहाया गम्हरीया महेशपुरया थःगु हे छेँय् द्यनाच्वंगु इलय् पण्डितयात हतियारधारीतय्सं अपहरण याना यंकूगु खः।
उखे आइतवाः सुथंनिसें बेपत्ता जुयाच्वंम्ह बोकटी आः तक मलूनिसां वयागु साइकल धाःसा दोधारा बजारय् लुयावःगु। कर्मचारी व छेँजःपिनि इनापय् प्रहरी वयात मालेगु ज्या यानाच्वंगु दुसा कञ्चनपुरया कर्मचारीतय्सं छवाः तक ज्या ठप्प यायेगु घोषणा यायेधुंकूगु दु। असारया न्हापांगु वालय् दोधारा गाविसया प्राविधिक सहायक यज्ञराज उपाध्याय नं बेपत्ता जूगु खःसा छुं दिं लिपा वयात स्यानाः वांछ्वयातःगु लुइकूगु खः।