तिब्बतीतय् न्हूम्ह संयोजक वल

येँ(सन्ध्या टाइम्स)/चीन व भारतं नेपाःया निंतिं न्हूपिं राजदूत छ्वयाहःगु इलय् लाक्क उखे निगुलिं देय्या चिउताःया विषय जुयाच्वंगु तिब्बती शरणार्थीतय्सं नं नेपाःया शरणार्थी मामिला स्वयेत न्हूम्ह हे संयोजक छ्वया हःगु दु।
भारतया धर्मशालास्थित तिब्बती शरणार्थीतय् 'निर्वासित सरकारं' नेपालय् थिले लामायात न्हूम्ह संयोजक नियुक्त याःगु खः। थ्व स्वयां न्ह्यः थ्व पदय् च्वनाः थिन्ले ग्यात्सों ज्या यानाच्वंगु खः। ग्यात्सो तिब्बती नागरिक खःसा लामा नेपाली हे नागरिक खः। उगु पदय् वःम्ह लामा न्हापांम्ह नेपाली नागरिक खः।
न्हूम्ह संयोजक लामां थःगु नियुक्तिया नापनापं नेपालय् च्वनाच्वंपिं तिब्बती शरणार्थीतय्सं आवंलि नेपाः दुने च्वनाः चीनयात मयइ कथंया छुं नं ज्या याये मते धकाः निर्देशन बिउगु दु। चिनियाँ दूतावास न्ह्यःने छुं नं कथंया प्रदर्शन मयायेगु व चीन तम्वइ कथं छुं नं गतिविधि मन्ह्याकेगु लागिं थःपिंत धर्मशालापाखें निर्देशन वःगु खँ नं लामां धाःगु दु।
दलाई लामा व 'निर्वासित तिब्बती सरकारं' न्हूगु परिस्थितिइ 'एक चीन' नीति नाला काःगु कारणं थुकथंया निर्णय याःगु खँ धाःगु दु।
नेपालय् च्वंपिं तिब्बती शरणार्थीतय्त न्ह्यःने तयाः चीन विरोधी तत्वतय्सं समेत ज्या यानाच्वंगु खने दयावःगुलिं आवंलि थःपिं अज्याःगु ज्याय् संलग्न मजुइगु खँ नं लामां धाःगु दु।
लामां धाः कथं थः नेपालय् च्वनेबलय् थनया तिब्बती शरणार्थीतय् म्हसीका पौ कायेगु बारे नं नेपाः सरकारलिसे वार्ता यायेगु खँ धाःगु दु। नेपाः सरकारं नेपालय् च्वंपिं तिब्बती शरणार्थीतय्त ताःई न्ह्यवं निसें हे म्हसीका पौ बीगु बन्द याना तःगु खः। थुकिं यानाः उमिसं नेपालय् च्वनाः ज्या यायेगु, जन्म दर्ता यायेगु आदि थेंज्याःगु छुं नं कानुनी ज्या याये खनाच्वंगु मदु।