कोसीया जनता त्राहिमाम

येँ (सन्ध्या टाइम्स)/लगातार वयाच्वंगु वा व कोसी खुसिइ वयाच्वंगु खुसिबालं थनिं निदँ न्ह्यः थें हे विश्वंश याइ लाकि धकाः स्थानीय जनता भयभीत जुयाच्वंगु दु। थौंकन्हय् कोसी खुसिइ तसकं हे लः बाः वयाच्वंगु कारणं इलय् हे ध्यान बीत नं स्थानीय जनतां माग याना हःगु दु ।

२०६५ सालय् कोसी खुसिइ तःधंगु बाः वःबलय् अन प्रति सेकेण्ड १ लाख ६४,५०० क्युसेक लः बाः वंगु खःसा थौं सुथय् थ्व खुसिइ ९४,३०० क्युसेक लः बाः वनाच्वंगु खँ धाःगु दु। उकिं थन न्हापा थें खतरा मदुगु खँ सुनसरीया प्रमुख जिल्ला अधिकारी चुडामणि शर्मां कनादीगु दु ।

पूर्वी तराईपाखे थौंकन्हय् मनसुन शुरु जुयाः तसकं वा वयाच्वंगु दु। उकिं नं स्थानीय मनूत ग्याःगु खः। तर पूर्वी तराई लागाय् तसकं वा वःसां पहाडी लागाय् धाःसा अझ नं बांलाक वा मवःगु जुयाः कोसीया बाः थहां कुहां जुयाच्वंगु दु। तराई व पहाडी लागाय् छक्वलं वा मवःगु जुयाः कोसीइ न्हापा थें विध्वंश जुइक बाः वइगु सम्भावना आः तक मदुनिगु खँ नं प्रजिअ शर्मां कनादीगु दु। ०६५ सालय् कोसीं थःगु वहाव हिलाः पूर्वी तटबन्ध हे तछ्यानाः मेथाय् बाः वंगुलिं आपालं धनजनया क्षति जूगु खः। उकिं नेपाःया सरकारं छुं खतरा मदु धाःसां स्थानीय जनता धाःसा त्राहिमाम जुयाच्वंगु दु ।

तुइन चबुनाः न्याम्ह बेपत्ता
येँ जिल्ला नाप स्वानाच्वंगु धादिङया ज्यामिरेघाटय् थौं सुथय् तुइन चबुनाः न्याम्ह मनू त्रिशुली खुसिइ बेपत्ता जूगु दु। त्रिशुली पार यायेत छ्यलीगु तुइनय् च्वनावंपिं न्याम्हं हे मनूत खुसिइ कुतुंवनाः बेपत्ता जूगु खः। गोरखाया ध्यालचोकपाखें तरकारी तयाः बेनीघाटपाखे वयाच्वंगु तुइन आकाझाकां चबुनाः उगु दुर्घटना जूगु खः। उकी लानाः तरकारी छम्ह मिसाम्ह तरकारी व्यापारी व प्यम्ह मिजंत बेपत्ता जुयाच्वंगु खँ धादिङ प्रहरीं धाःगु दु। झिम्ह मनू च्वनाः यंकाच्वंगु तुइन दथुइ थ्यंकाः चबूगु खः। उकी लानाः घाःपाः जूपिं मेपिं न्याम्हेसित धाःसा स्थानीय मनूतय्सं उद्धार याःगु दु। इमित स्थानीय स्वास्थ्य चौकीइ वासः याकाच्वंगु दु। बेपत्ता जूपिंत मालेत प्रहरी व स्थानीय मनूतय्सं कुतः यानाच्वंगु दु। त्रिशुलीइ तसकं खुसिबाः वयाच्वंगुलिं बेपत्ता जूपिंत मालेत नं थाकुयाच्वंगु व उमित जीवित लुइकेत थाकुइगु खँ धाःगु दु ।