स्वनिगःया जनसंख्या करिब बागू करोड

येँ (सन्ध्या टाइम्स)/थुगुसी जुयाच्वंगु राष्ट्रिय जनगणनाया थौं अन्तिम न्हि। थौं छन्हु गणना कायेधुंकल कि थुगुसीया जनगणना कायेगु ज्या क्वचाइ। उकुन्हु तक गणकत छेँय् छेँय् वनाः गणना काःगु खःसा थौं छेँ मदुपिं मनूत जोगी, फ्वगिं, सतक मस्तय्गु गणना काइगु खँ येँया जनगणना अधिकृत ज्ञानेन्द्र वज्राचार्यं कनादिल ।

तर छेँय् छेँय् वनाः गणना कायेगु ज्या थौं क्वचाइगु खःसां गनं छुटे जूगु जानकारी वल धाःसा अन वनाः हानं गणना कायेगु ज्या धाःसा असार १८ गते तक न्ह्याइगु खँ नं वय्कलं कनादिल। उकिया लागिं तथ्यांक विभागं टोल फ्रि फोन नम्बर बियातःगु दु ।

१८ गते लिपा असार मसान्त तक हे फाराम संकलन यायेगु ज्या जुइ। अले श्रावणं प्राविधिक तयारी यानाः डाटा इन्ट्री शुरु याइ। थुकिया लागिं करिब खुसः ति मनू मालीगु व थ्व मनू एजेन्सीतपाखें पूर्ति यायेगु तयारी जुयाच्वंगु दु। असोज मसान्तं थ्व जनगणनाया प्रारम्भिक रिपोर्ट पिहां वइगु खँ नं भाजु वज्राचार्यं कनादीगु दु। उकी कुल जनसंख्या, मिसाया ल्याः, मिजंया ल्याः आदि थेंज्याःगु संख्या वइ ।

फुक्क डाटा इन्ट्री यायेत करिब निदँ ति ई काइगु अनुमान दु। आः काःगु जन गणनाया पूवंगु विवरण वि.सं. २०७० पाखे जक पिकाये फइगु खँ नं भाजु वज्राचार्यं कनादिल।
जनगणना शुरु याये न्ह्यः नमूना कथं घरपरिवार संख्या काःबलय् स्वनिगः दुने ३० लाख स्वयां अप्वः जनसंख्या थ्यंगु व आः छेँय् छेँय् गणना काःबलय् थ्व ल्याः अझ हे अप्वःगु खँ नं वय्कलं कनादिल। थ्व ल्याखं स्वनिगःया जनसंख्या तसकं अप्वः जूगु खनेदु धाःगु दु ।