अपराधी ज्वनेत सीआईबी ताःलाःगु दावी
येँ (सन्ध्या टाइम्स)/समाजय् प्रहरीया इज्जत व विश्वास कुहां वनाच्वंगु इलय् लाक्क प्रहरीया केन्द्रीय अनुसन्धान ब्युरो (सीआईबीं) थःपिनि सक्रियतां ततःधंपिं अपराधीतय्त ज्वने फुगु दावी याःगु दु ।
लछिया दुने तःगूमछि घटनाया दोषीतय्त ज्वनेत सफल जूगु सीआइबीं वंगु असार ९ गते सम्झना फाइनान्सया पुलांम्ह प्रमुख कार्यकारी अधिकृत हिमबहादुर गुरुङयात ४ करोड १९ लाख तका अनियमित याःगु द्वपनय् थनया वनस्थलीं ज्वंगु खः। नेपाल प्रहरीयाके दुगु साधन स्रोतयात छ्यलाः सीआइबी प्रमुख राजनसिंह भण्डारीं नेपालय् दुगु वित्तीय संस्था व कल बाइ पास (भिओआइपी) छले याःगु द्वपनय् लाःपिंत ज्वनेगु ज्या न्ह्यासेंलि 'प्रहरीं इच्छा यायेगु खःसा न्ह्यागुं ज्या यायेफु' धइगु विश्वास ब्वलंगु दावी नं सीआईबीं याःगु दु ।
दछि न्ह्यः नेपाल प्रहरीपाखें जनताया विश्वास तनावंगु महसुस जुसेंलि सीआईबीं आःतक जूगु आपराधिक गिरोहनिसें कयाः वित्तीय संस्थाया ठगतय्त ज्वनेगु ज्या न्ह्याकूगु खः। विशेष यानाः वित्तीय संस्थाय् सर्वसाधारण नेपाःमितय् ध्यबा डुबे जुइगु क्रम अप्वया वनेवं अज्याःपिंत ज्वनेगु शुरु याःगु खःसा वंगु वैशाखं निसें सीआईबीं १५ गू ठगी केशया मनूत ज्वनेधुंकूगु दु। छुं ला न्ह्यः सीआईबीया हे सक्रियताय् गोरखा डेभलपमेन्ट बैंकया कार्यकारी निर्देशक डीबी बम्जनयात ज्वंगु खःसा अन्तर्राष्ट्रिय कल बाईपास छले यानाः सरकारया राजश्वय् क्षति याःपिं न्याम्ह मनूयात नं लैनचौरं ज्वंगु खः ।
उकथं हे युनाइटेड डेभलपमेन्ट बैंकया पुलांम्ह अध्यक्ष रविन्द्रबहादुर सिंह व संचालक राधाकृष्ण अमात्ययात नं सीआईबीया हे सक्रियताय् ज्वंगु खः ।
