रमापतिराजयात नेपालभाषा शिरोमणि
ख्वप (सन्ध्या टाइम्स)/नेपालभाषाया व्याकरणबिद् व भाषाथुवाः रमापतिराज शर्मायात ख्वपया दक्कलय् पुलांगु साहित्यिक संस्था नेपाल साहित्य मन्दिरपाखें म्हिगः छगू समारोह यासें 'नेपालाभाषा शिरोमणि' उपाधिं छायेपिल। नेपाल प्रज्ञा प्रतिष्ठानया कुलपति बैरागी काइँलां वय्कःयात दोसल्लां न्ययेकाः सिजःपौ लःल्हासें हनेज्या यानादीगु खः। ज्याझ्वलय् वय्कलं सम्मानित व्यक्तित्व रमापतिराज शर्मां च्वयादीगु न्हूगु ब्याकरण सम्बन्धी सफू 'झीगु न्व व वया हागः' नांगु न्यागूगु सफू नं बिमोचन यानादिल। वय्कलं रमापति थेंज्याःपिं व्यक्तित्वत देशया लागिं तसकं हे महत्वंजाःगु खँ नं कनादिल ।
समारोहय् नेपालभाषा एकेदमिया चान्सलर सत्यमोहन जोशीं नेपाल साहित्य मन्दिरया दँपौ 'मन्दिर'या ल्याः ३ विमोचन यानादिल। ज्याझ्वलय् वय्कलं स्वनिगःया नेवाःतय्सं हे थःपिनि मांभाय् त्वःताच्वंगुलिं राष्ट्रिय जनगणनाय् नेवाःतय् वास्तविक ल्याः दुथ्याके थाकुयाच्वंगु खँ कुलादिल। नेपाल साहित्य मन्दिरया नायः तिलकप्रकाश कायस्थया सभापतित्वय् सिद्धिस्मृति प्रतिष्ठानया सभाकक्षय् जूगु उगु समारोहय् मदन पुरस्कार गुथिया अध्यक्ष कमलमणि दीक्षित, विराट गुथिया छ्याञ्जे महेन्द्र गोपाल कर्माचार्य, प्रा. डा. सुन्दरकृष्ण जोशी, 'थौंकन्हे' लय्पौया सम्पादक रुक्मिणी श्रेष्ठ व रमापतिया शिष्य छम्ह अमेरिकी नागरिकं नं रमापतिराज शर्मा नापया थःपिनि स्वापू बारे कनादीगु खः ।
