धर्मादित्य सिरपाः नानीभाई मिखाद्वःमियात
यल (सन्ध्या टाइम्स)/ थुगुसीया धर्मादित्य धर्माचार्य सिरपाः च्वमि नानीभाई मिखाद्वःमियात बीगु जूगु दु। मांभाय् पुचः यलया सल्लाहकार डा. पुष्पराज राजकर्णिकार कजि जुयादीगु धर्मादित्य धर्माचार्य सिरपाः समितिया थौं च्वंगु मुँज्यां च्वमि नानीभाईयात उगु सिरपाः बीगु क्वःछिउगु खः। च्वमि मिखाद्वःमिं 'देशय्मरु झ्याः' वाःपती मदिक्क च्वसुत च्वयादीगुलिं उकियात कदर यासें थुगु सिरपाः बीत्यंगु खः। सिरपालय् सिजःपौया नापनापं न्याद्वः व छतका दां दु। अथेहे मुँज्यां हास्यव्यंग्य साहित्यकार मदनमोहन मिश्रयात हनेगु नं क्वःजिउगु दु ।
मांभाय् पुचः यलपाखें ने.सं. ११२२ निसें दँय्दसं धर्मादित्य धर्माचार्य सिरपाः बिया वयाच्वंगु खःसा भाषाजवाः धर्माचार्यया ११० क्वःगु बुदिंया लसताय् वइगु दिल्लागा आमाइ (श्रावण १४ गते) थुगुसीया सिरपाः लःल्हाइगु ग्वसाः दु ।
