कानूनय् हिन्दू मान्यता कथंया दफा

देश धर्म निरपेक्ष राज्य घोषणा जुइधुंकाः नं उकिया आभास हे याये मफइ कथंया गतिविधि अझ नं न्ह्यानाच्वंगुया दसु न्ह्यःने वःगु दु। सदनय् न्ह्यब्वःगु चौपाया सम्बन्धी छगू ऐनयात कयाः विवाद जुयाच्वंगु हे इलय् सा स्याःगु धइगु द्वपं बियाः राजधानी येँय् हे छुं मनूतय्त ज्वनाः कुनेगु जक मखु उमित ज्वने दइ मखु धकाः धाः वंपिं आदिवासी जनजाति महासंघया पदाधिकारीतय्त तकं हिरासतय् कायेगु ज्या याःगु दु।
नेपाःया अन्तरिम संविधानय् नेपाःयात धर्म निरपेक्ष राज्य धकाः घोषणा याना तयेधुंकूगु दु। उकिं न्हापा थें हिन्दू धर्मय् जक मान्यता बियातःपिं सा द्वहं थेंज्याःपिं चौपाया स्याये मजिउ धायेगु पाय्छि मखु। उकियात कानुनी रुपं हे सुरक्षित यायेगुया अर्थ नेपाःयात अझ नं हिन्दू राष्ट्रया हे धार्मिक बन्धनय् कुंका तयेगु जू वनी ।

कानून छुं नं धर्मया बन्धनय् च्वने मजिउ। गुलिखे देशय् इस्लाम धर्मया आधारय् कानून दयेकातःगु कारणं अनया मेमेगु धर्म माने याइपिं मनूतय् मानव अधिकार हनन् जुल धकाः खँ पिहां वयाच्वंगु सकस्यां सिउ। गथे इस्लाम धर्मया आधारय् कानून दयेकेबलय् गैर इस्लामतय् मानव अधिकार हनन जुइ, अथे हे हिन्दू धर्मया आधारय् कानून दयेकेबलय् नं गैर हिन्दूतय् मानव अधिकार हनन् जुइ। हिन्दू मूल्य मान्यता माने यायेत सकलें हिन्दूतय्त छुट दु तर व मान्यता गैरहिन्दूतय्त लादे यायेगु अधिकार धाःसा सुयातं मदु। थ्व खँय् सकलें सचेत जुइमाः। उकिं कानूनय् हिन्दू धर्मया मान्यता कथं च्वयातःगु दफात तुरुन्त संशोधन यायेगुपाखे सरकारं तत्परता क्यनेमाः ।

More Stories Like this