नां ज्वःलाःगुया दुःख

डा. तुल्सीनारायण श्रेष्ठ

समाजय् ख्वाः ज्वःलाःपिं, नां ज्वःलाःपिं, आनीबानी, सः आदि ज्वःलाःपिं मनूत दयाच्वनी। थ्वहे ज्वःलाइगुया सन्दर्भय् छगू समाजय् छपाः हे ख्वाः वा उथें च्वंपिं मनूत थ्व हलिमय् मुक्कं ७ म्ह दइ धइगु धापू दु। समाजय् थथे ख्वाः ज्वःलाःपिं मनूत खनाः हे जुइ सिनेमा दयेकीपिंसं नं ख्वाः ज्वःलाःपिनिगु विषयवस्तुयात कयाः न्ह्याइपुसेच्वंगु सिनेमा दयेकाच्वंगु दु। सिनेमाय् थें हे झीगु समाजय् नं थथे हे ख्वाः ज्वःलाःपिं मनूत दयाच्वनी। झीसं सामान्यकथं ख्वाः ज्वःलाःपिं मनूतय्त झ्वाट्ट स्वयेबलय् झीत न्ह्याइपु ताइगु जूसां थुज्वःगु ज्वः लाइगु प्रवृत्तिं मनूतय्गु जीवनय् धाःसा तसकं ततःधंगु समस्या नं ब्वलनाच्वंगु जुइफु। अले गुलिं मनूतय्त ला थुज्वःकथं ख्वाः, बानी, सः वा मेमेगु पक्ष नं ज्वःलाःगु सन्दर्भय् भ्रम जुयाच्वंगु जुइफु। थुज्वःगु नां ज्वःलाःपिं मनूत भ्रमय् लाइगु खँया सन्दर्भय् जि (च्वमि) स्वयं नं छम्ह खः। गुम्हसिनं नां ज्वः लाःगु सन्दर्भय् जोखिमया सामना याये मालाच्वंगु दु ।

छन्हु छथाय् भ्वय् वनागु। पासानाप गफ यायां नये, त्वने नं याना हे च्वनागु। उगु हे इलय् छम्ह मेम्ह पाहां दुहां वल। वय्कः जिनापं च्वनाच्वंम्ह पासाया पासा जुयाच्वन। वय्कः जिपिं नापं हे �यतुनादिल। जिनाप वय्कःया परिचय नं जुल। वय्कः सामान्य प्रशासन मन्त्रालयया निवर्तमान अधिकृत खः धइगु खँ जिं वय्कःलिसेया परिचयया झ्वलय् सीका। वय्कःलिसे परिचय यायेगु �वलय् वय्कलं जितः धयादिल, 'डाक्टर साहेब छिगु सफू जिं ब्वनागु दु। बांलाः। बधाई दु। हाकनं-हाकनं च्वयादिसँ। जिपिं थेंजाःपिं प्रशासकतय्त ज्या वः।' भ्वजय् हुलमुल। जिं सिल वय्कलं ब्वनादीगु सफू जिगु मखु धकाः। मेम्ह हे डा. तुलसीनारायण श्रेष्ठया सफू खः। वय्कःयात जिं वय्कःया बधाईया लिसः हे बी मलाः। हाकनं मेम्ह पाहांनाप खँल्हाबल्हा जुल ।

अथे हे पासापिं नापलाइबलय् बधाई दु, डाक्टर साहेब, बांलाः डाक्टर साहेब, सुभाय् दु डाक्टर साहेक धकाः धाइपिं बारम्बार नाप लाः। घौछि खँल्हाबल्हा जुल कि सीदइ वय्कःपिंसं बियादीगु बधाईया कारण, सुभाय्या कारण। अले वय्कःपिंसं च्वसु पिहां वःगु, सफू पिहां वःगु खँ नं न्ह्यथनादी। पिहां वःगु च्वसु, पिहां वःगु सफू खास जिगु हे जूसा वा जिगु हे खःसा बधाई बिउपिं पासापिं व जि निखलःसितं ज्याछिनीगु खः। निखलःसितं न्ह्याइपुइगु खः। अले जिं नं वय्कःपिंत बधाईया सुभाय् देछाये तर गबलें गबलें पिहां वःगु च्वसु जिगु मखयाः मेम्ह हे भाजु तुलसीनारायण श्रेष्ठयागु जुयाच्वनी। अले वय्कःपिंत व जितः निखलःसितं ज्यामछिनी। अले जिं 'सरी,सरी' धाये मालाच्वनी ।

जिं ला सिउ जिगु नां, जात, पद तकं ज्वःलाःम्ह मेम्ह हे छम्ह डा. तुलसीनारायण श्रेष्ठ धइम्ह दु। मिडियापाखें अले मिडियाय् वइगु च्वसु, सफू, पिहां वःगुलिं जक सिउगु खः। वय्कः प्रशासन सम्बन्धी पिएच.डी. याना वःम्ह डाक्टर जुयाच्वन। इलय्-ब्यलय् च्वसुत नं पिहां वइगु जुयाच्वन। वय्कःयात जिं व्यक्तिगत रुपं म्हमसिउ। मिडियापाखें हे म्हसिउगु खः ।

थुखे जि जुल मेडिकल डाक्टर। वय्कःया नां, जात व पद तकं ज्वःलाःम्ह। हाकनं जि नं इलय्-ब्यलय् च्वसु च्वइम्ह। पत्रपत्रिकाय् च्वसु पिकाइम्ह। तर जिगु च्वसु खास यानाः स्वास्थ्य सम्बन्धी हे जुयाच्वनी। इलय्-ब्यलय् साहित्य नं च्वया। बाखं, चिनाखँ आदि। अले जिगु स्वंगू साहित्यिक सफू, उपन्यास नं पिहां वयाच्वंगु दु। बस् वहे कारणं पासापिं वा म्हसिउपिं नापलात कि जितः सुभाय्, बधाई बीगु जुयाच्वन तर गबले-गबलें हे पिहां मवःगु सफू व च्वसुया बधाई जुयाः म्हाइपुसे च्वनीगु।
थ्व ला जितः इलय्-ब्यलय् बारम्बार जुयाच्वनीगु परिस्थिति। शायद परे जुयाः हे च्वनी तिनि जुइ। अले बधाई बीपिंत, सुभाय् बीपिंत थ्व जोखिम जुयाच्वनी तिनि जुइ। जितः थें हे वय्कःयात जू ला मजू ला जिं मसिउ। छखे न्ह्याइपुसे च्वनीसा मेखे गबलें हे खःगु खँ कने मलाइबलय् म्हाइपुसे नं च्वनी। थःथम्हं फताहा, ठग थें तायावइ। वय्कःनाप जिगु नां जक मखु जात व पद तकं ज्वःलाःगुया लिच्वः खः थ्व। वय्कःया च्वसु, सफूत नं पिहां वया हे च्वनीगु, अले जिगु च्वसु, सफू नं पिहां वया हे च्वनीगु। तर विषय धःसा तसकं ब्यागलं। खास यानाः जिगु च्वसु स्वास्थ्य व साहित्य सम्बन्धी जुइसा जिं सिउकथं वय्कःया च्वसु समाजशास्त्र व प्रशासन सम्बन्धी जुयाच्वनी। सकसिनं थ्व थुइका बिउसा जिउ थें ताः ।

More Stories Like this