धर्मादित्य धर्माचार्य सिरपाः च्वमि मिखाद्वःमियात

थुगुसीया धर्मादित्य धर्माचार्य सिरपाः च्वमि नानीभाई मिखाद्वःमियात बीगु जूगु दु ।

मांभाय् पुचः यलया सल्लाहकार डा. पुष्पराज राजकर्णिकार कजि जुयादीगु धर्मादित्य धर्माचार्य सिरपाः समितिया थौं च्वंगु मुँज्यां च्वमि नानीभाईयात सिरपाः बीगु क्वछिउगु खः ।

समितिपाखें च्वमि नानीभाई मिखाद्वःमिं नेपालभाषाया वाःपौ "देशय्मरु झ्याः" पतिइ मदिक्क च्वसुत च्वयादीगुलिं उकिया योगदानयात कदर यासें थुगु सिरपाः बीत्यंगु खः । थुगु सिरपालय् सिजःपौया नापनापं न्याद्वः व छतका दुगु खःसा थ्व झिक्वःगु धर्मादित्य धर्माचार्य सिरपाः खः ।

अथेहे थौं च्वंगु मुँज्याय् हास्यव्यंग्य साहित्यकार मदनमोहन मिश्रयात हनेगु नं क्वःजिउगु दु ।

मांभाय् पुचः यलपाखें ने.सं. ११२२ निसें दँय्दसं धर्मादित्य धर्माचार्य सिरपाः बियावयाच्वंगु खःसा भाषाजवाः धर्माचार्यया ११० क्वःगु बुदिंया लसताय् बीत्यंगु थुगु सिरपाः वइगु ने.सं. ११३१ दिल्लागा आमाइ (२०६८ श्रावण १४ गते) शनिवाः छगू ज्याझ्वःया दथुइ बीगु पुचलं जानकारी बिउगु दु ।

थुगु सिरपाः पूर्णकाजी ताम्रकार, बुद्धाचार्य शाक्य, भिक्खु संघरक्षित, विजयरत्न असंबरे, विनोद साय्मि "आलः", डा. तुल्सीनारायण श्रेष्ठ, काशीनाथ तमोट, सुनीता मानन्धर व रुकमणी श्रेष्ठयात बीधुंकूगु दु ।

More Stories Like this