भाषाथुवाः नापं व्याकरणविद् शर्मा 'नेपालभाषा शिरोमणि'पाखें विभूषित

नांजाःम्ह भाषाजवाः, भाषाथुवा व व्याकरणविद् हनेबहःम्ह रमापति राज शर्माजुयात थौं छगू ज्याझ्वःया दथुइ "नेपालभाषा शिरोमणि" विभूषणं छायेपियाः सम्मान याःगु दु ।

नेपाल साहित्य मन्दिर ख्वपया ग्वसालय् जूगू उगु ज्याझ्वलय् मूपाहां नेपाल प्रज्ञा प्रतिष्ठानया कुलपति बैरागी काइँलां भाजु शर्मायात "नेपालभाषा शिरोमणि"या हनापौ देछायादीगु खः ।

ज्याझ्वलय् नेपालभाषा एकेदमिया चान्सलर नापं संस्कृतविद् सत्यमोहन जोशीं दोसल्लां न्ययेकादीगु खःसा मदन पुरस्कार गुथिया नायः मदनमणि दीक्षितं स्वांमाः क्वखायेकादीगु खः । अथेहे सिद्धि स्मृति प्रतिगठानया नायः श्यामसुन्दर धौभडेलं तपुलिं पुइकादीगु खःसा जरीमैंया सिरपाःया दाता कुमार साखःनं झिंनिद्वः तकाया म्हिचा नं लःल्हानादीगु खः ।

साहित्य मन्दिरया नायः तिलक प्रकाश कायस्थया सभाध्यक्षय् जुगू उगु ज्याझ्वलय् रमापतिराज शर्माजुं च्वयादीगु "नेपालभाषाया न्व व उकिया हाग्वः" नांया सफू मूपाहां काइँलापाखें व "रमापतिराज विशेषांक मन्दिर" पत्रिका संस्कृतविद् सत्यमोहन जोशीपाखें मंकाः कथं पितब्वज्या यानादीगु खः ।

ज्याझ्वलय् साहित्यकार तेजेश्वर बाबु ग्वंगः, प्रा. डा. सुन्दरकृष्ण जोशी, डा. बोयड मिसिलोभ्स्की, महेन्द्र कर्माचार्य आदिपिन्सं भिन्तुना व भाजु रमापतिराज शर्माया बारे न्ववानादीगु खः ।

More Stories Like this