सा स्याःगु द्वपनय् गिरफ्तार

येँ (सन्ध्या टाइम्स)/सा स्याःगु द्वपं बियाः प्रहरीं ज्वनाः कुनातःपिं प्यम्ह आदिवासी जनजातितय्त नाप लायेत थौं बौद्ध प्रहरी चौकीइ वंम्ह नेपाल आदिवासी जनजाति महासंघया महासचिव आङकाजी शेर्पायात प्रहरीं छुं ईया निंतिं नियन्त्रणय् काःगु दु। अथे 'गौहत्या' काण्डय् ज्वनाः तयातःपिं मनूतय्त नापलाःवःम्ह छ नं स्वापू दइ धकाः थःत प्रहरीं छुं ईया निंतिं नियन्त्रणय् काःगु जानकारी शेर्पां बियादीगु दु ।

अथे जनजाति महासंघया महासचिव शेर्पायात बिना कारण प्रहरी चौकीं कुनेगु ज्या याःगु विरोधय् थौं हे आदिवासी जनजाति महासंघया अध्यक्ष राजकुमार लेखीं विज्ञप्ति पिथनाः विरोध याःगु दु ।

येँया उत्तरपूर्व लागाया मुलपानी गाविसं सा स्याःगु द्वपनय् प्यम्ह जनजातितय्त ज्वना हयाः बौद्धया चौकीइ कुनातःगुलिं थःपिंसं अथे चौकीइ तकं घेराउ यायेत्यनागु खः धयादीगु दु। प्रहरीं 'गौहत्या' याःगु द्वपनय् सिन्धुलीया चन्द्र बुढाथोकी, धरानया राजकुमार लामा, रामेछापया दावा मोक्तान व नुवाकोटया इन्द्र तामाङयात कुनातःगु दु। नेपाल आदिवासी जनजाति महासंघं कन्हय् चौपाया पशु विधयेक विरुद्ध बौद्धया प्रहरी चौकी घेराउ याइगु जूगु दु। अथे चौकी घेराउ यायेधुंकाः संविधानसभा तकं घेराउ यायेगु ज्याझ्वः तयार यानागु दु धकाः महासंघया महासचिव आङकाजी शेर्पां धयादीगु दु। थःपिंसं अथे विधयेक लित कायेमाःगु नापं आदिवासी जनजातिया माग कथं जातीय आधारय् स्वायत्तता, स्वशासन, आत्मनिर्णयया अधिकार नापं अग्राधिकारया माग यानाः कन्हय् घेराउ यायेत्यनागु खः धकाः नं धाःगु दु ।

धर्म निरपेक्षता विरोधी ऐन
सरकारं संसदय् पेश याःगु चौपाया सम्बन्धी ऐनयात कयाः जनजाति सभासद्तय्सं विरोध यानाच्वंगु दु। उगु ऐनया दफा २९१ य् सा व द्वहं स्याइपिंत ज्वनेगु व कुनेगु व्यवस्था यानातःगु खँयात कयाः जनजाति सभासद्तय्सं कडा रुपं विरोध याःगु खः। आः देय् धर्म निरपेक्ष राज्य जुइधुंकाः तक नं सा व द्वहंयात स्यात धाःसा स्वदँ जेल सजायँ, दायाः अंग भंग यात धाःसा खुला कैद व मेमेगु कथंया घाः लाकल धाःसा न्यय्द्वः तक बं पुइकेगु व्यवस्था यानातःगु खः। थुकिं धर्म निरपेक्षता व अन्तरिम संविधानया उपहास याःगु दु धासें सभासद्तय्सं उकियात विरोध याःगु खः ।