किपुली विद्यार्थीपाखें होष्टेलय् आत्महत्या !

किपू (सन्ध्या टाइम्स)/किपूया थीथी स्कूलत मध्ये एसएलसीइ बांलाक नतिजा हयेगु यानाच्वंगु किपूया छगू लोकंह्वाःगु निजी स्कूल पुष्प सदन आवासीय मावि खः।किपुली दकलय् अप्वः विद्यार्थी दुगु कथं नालातःगु उगु स्कूलं थुगुसी एसएलसीया नतिजा कथं परिक्षाय् सहभागी जूपिं जम्मा ११४ खःसा उपिं सकलें हे पास जूगु खः ।

पास जूपिं मध्ये ५८ विशिष्ट श्रेणी व ५६ न्हापांगु श्रेणीइ वःगु खःसा निगूगु श्रेणी व स्वंगूगु श्रेणी वःपिं तकं मदु।
अथे दँय्दसं तसकं नतिजा बांलाना वनाच्वंगु उगु स्कूलय् वंगु शुक्रवाः छगू घटना जुइवं स्थानीय मनूत नापं अभिभावकत अजूचाःगु दु। सामान्य परिवारय् जन्म जुयाः आखः बांलाक ब्वनीम्ह जुयाः विदेशीतय्गु सहयोगं उगु स्कूलया होस्टेलय् च्वनाः ब्वनाच्वंम्ह १५ दँया मन्जु आचार्यं आत्महत्या यात धकाः स्कूल प्रशासनं धायेवं मनूत अजू चाःगु दु। स्कूल प्रशासनं आत्महत्या यात धाःगु दुसा अभिभावकतय्सं धाःसा व आत्महत्या मखु धकाः दावी यानाच्वंगु दु ।

शुक्रवाः न्हिनय् उगु घटना जूगु खः। फम्पिइ छेँ दुम्ह विद्यार्थी मन्जुं हे यगानाः आत्महत्या याःगु दावी यानाच्वंगु दु धकाः स्कूल प्रशासनं दावी याःगु दु। थःपिंसं खंगु इलय् म्ह क्वानाच्वंगुलिं आकाझाकां अस्पताय् यंकागु धकाः स्कूल प्रशासनं तर्क तयाच्वंगु दुसा मन्जुया अभिभावकपिंसं धाःसा उकियात स्वीकार यानाच्वंगु मदु। अज्वःगु घटना लिपा मदुम्ह मन्जुया सीम्ह पोष्टमार्टमया निंतिं टिचिङ अस्पतालय् यंकूगु दुसा थौं जक पोष्टमार्टम याइ धकाः धाःगु दु। उगु कथं स्कूलय् घटना जुइ धुनेवं पुष्प सदनय् होष्टेलय् हे तयातःपिं मस्तय्त अभिभावकतय्सं थःथःगु छेँय् यंकेगु ज्या म्हिगः शनिवाःनिसें याःगु दु। उगु घटनां यानाः स्कूलयात बांमक्क प्रभाव लायेफु धयाहःगु दु ।