डुंगा फातापुलाः नकतिनि ब्याहा जूपिं कलाःभाःत बेपत्ता
येँ (सन्ध्या टाइम्स)/ओखलढुंगां उदयपुरपाखे जन्ती च्वना वंगु डुंगा थौं सुथय् साढे ८ बजे सुनकोशी खुसिइ फातापुलाः ब्याहा याना वःपिं मिजं भम्चा नापं स्वम्ह मनू बेपत्ता जूगु दु। बेपत्ता जूम्ह मिजं उदयपुरया घुर्मी लागाया महेश धमला खःसा भम्चा बलखुया सुमित्रा लुइँटेल व जन्ती वःम्ह घुर्मी गांया हे तिलक राई खः ।
प्रहरीं बिउगु जानकारी कथं ओखलढुंगाया बलखुपाखें उदयपुरया घुर्मीपाखे वनाच्वंगु डुंगा बलखु ७ या थम्लेघाटय् फातापूगु खः। गुम्ह यात्रु च्वनावंगु डुंगा अथे दुर्घटना जुयाः स्वम्ह तनाच्वंगु दु। बेपत्ता जूपिं प्यम्ह मध्ये छम्ह घाःपाः जुयाच्वंगु अवस्थाय् प्रहरीं लुइकूगु दु। उगु घटनाय् लानाः बेपत्ता जुयाच्वंपिं मनूत मालेगु निंतिं स्थानीय मनूत नापं प्रहरीत घटनास्थलय् थ्यंकः वनेधुंकूगु दु ।
