राना व खड्काया छेँय् भ्वं तिकल
येँ (सन्ध्या टाइम्स)/सुडान घोटालाया अभियुक्तत पुलांम्ह प्रहरी महानिरीक्षक ओमविक्रम राणा व निलम्बित अतिरिक्त महानिरीक्षक मदनबहादुर खड्काया छेँय् विशेष अदालतय् उपस्थिति जुइत पूर्जी तिकूगु दु ।
यलया जिल्ला अदालतपाखें १५ न्हुया दुने अदालतय् उपस्थित जुइत बिउगु पूर्जी बुझे याना मकाःगुलिं उगु कथं छेँय् हे तिकाः लिहां वंगु दु। थ्व सिबें न्ह्यः इमिसं पूर्जी बुझे याना कायेत अस्वीकार याना वयाच्वंगु खः। अथे पूर्जी बुझे याना कायेत तयार मजुल धाःसा छेँय् तिका वनेगु नापं उकियात हे आधिकारिक कथं नालाः कायेमाःगु व्यवस्था नेपाःया कानुनय् यानातःगु दु। अथे भ्वं तिकावंगुया १५ दिंया दुने हे इपिं अदालतय् उपस्थित जुइमाः। राष्ट्रसंघया आह्वानय् सुडान वनाच्वंपिं नेपाल प्रहरीया निंतिं एपीसी नाप सामाग्रीत न्यायेगु झ्वलय् थ्यंमथ्यं ३० करोड भ्रष्टाचार याःगु अभियोगय् राणा व खड्कानापं ३६ म्ह विरुद्ध अख्तियार दुरुपयोग अनुसन्धान आयोगं विशेष अदालतय् मुद्दा दायर याःगु खः। अख्तियारं जेठ २४ गते मद्दा दायर यायेधुंकाः जेठ १५ गते १५ न्हुया म्याद तयाः अभियुक्ततय्त अदालतय् उपस्थित जुइत विशेष अदालतपाखें आदेश बिउगु खः ।
