सभासद् निलम्बन बारे नेवाःतय् अन्तर्क्रिया

नेपाः राष्ट्रिय पार्टीया सभासद् बुद्ध साय्मियात संसदं निलम्बन याःगु विषययात कयाः थन छगू अन्तर्क्रियात्मक ज्याझ्वः जुल। ज्याझ्वलय् आःया अवस्थाय् नेपाः राष्ट्रिय पार्टीं गुकथं पलाः न्ह्याकेमाली धइगु विषयय् सहलह ब्याकेगु ज्या जूगु खः। पार्टीया अध्यक्ष डा. केशवमान शाक्यं संसद दुने थौंकन्हय् जुयाच्वंगु षड्यन्त्रया विषयय् नेवाः व नेपाः राष्ट्रिय पार्टी गम्भिर जुइमाःगु खँ कनादिल। वय्कलं यदि राजधानी प्रदेश वल धाःसा नेवाःतय्गु अस्तित्व हे मल्यनीगु, सा वा द्वहंयात दाल वा स्यात धाःसा खुला तक जेल सजाँय जुइगु विधयेक हयेत्यंगु बारे मेमेगु राजनैतिक पार्टीतय्सं न्वमवाः, उकी नेपाः राष्ट्रिय पार्टीं सः तयाच्वंगु दु धयादिल। नापं प्यम्ह सभासद्तय्सं सर्वोच्च अदालतय् निलम्बन विरुद्ध तः वंगु रिटय् दरपिठ याना हःगुलिं व्यवस्थापिका व कार्यपालिका जक मखु न्यायपालिका तकं जनजातिया पक्षय् मदुगु स्पष्ट जू धयादिल ।

निलम्बित सभासद् बुद्ध सायमिं थःपिं अराजक जुइत मखु दलित, आदिबासी जनजाति, मुस्मां व बहिष्करणय् लाःगु समूदायया प्रतिनिधित्व यानाः समावेसी विधयेक हयेगु निंतिं पलाः ल्ह्वनागु खः धयादिल। वकुन्हु संसदय् मन्त्री उर्मिला अर्याल एजेन्डा हे मदुगु विषय ज्वनाः न्ह्यःने वंगुलिं थःपिंसं शान्तिपूर्ण तरिकां विरोध यानागु व उकी हे थःपिंत निलम्बन याःगु खः धयादिल ।

शिक्षाविद् लक्ष्मण राजवंशीं न्हापांनिसें जुया वयाच्वंगु षड्यन्त्रयात नेवाःतसें विरोध मयाःगुया लिच्वः हे थ्व खः धासें थुगु घटनायात नं आः तकं सुरुवातया हे रुपय् कयाः सचेत जुइमाःगु व आःया अवस्थाय् सहि ढंगं आन्दोलनय् वनेमाःगु खँ कनादिल। डा. महेशमान श्रेष्ठं प्रत्यक वडाय् आन्तरिक सहलह दबू चयेके माःगु, नेवाःतय् दथुइ वं वयात वं वयात कुंखिनेगु बानी त्वःते माःगु व सुं नं राजनैतिक पार्टीया लिउलिउ मवँसें थःगु हे बलं नेवाःत राजनैतिक रुपं न्ह्यज्यायेमाःगु खँ कनादिल। ज्याझ्वलय् न्वकु डा. रमेश कुमार श्रेष्ठ, शाक्य सुरेन, रघु राजभण्डारी, मय्जु अंजलिया रंजितपिंसं नं थःथःगु बिचाः न्ह्यब्वयादीगु खः ।