मन्त्रीयात मानन्धरतय् ख्यें सगं
केन्द्रीय मानन्धर संघं बातावरण मन्त्री सुनिल कुमार मानन्धरयात छगू समारोहया दथुइ हनेज्या यात। नेकपा (संयुक्त) पाखें मन्त्री जुयादीम्ह वय्कःया कारणं मानन्धर समाजया गरिमा च्वन्ह्याःगुलिं संघं वय्कःयात हंगु खः। संघया नायः न्हुच्छे बहादुर मानन्धरं वय्कः हनापौ व ख्यें सगं बियाः सम्मान याःगु खः ।
थःत याःगु सम्मानया कदर यासे हनें मन्त्री मानन्धरं थम्हं समाज व संघया लागिं फुगु ग्वहालि यायेगु बचं नं बियादिल। नापं वय्कलं थः मदुम्ह बाज्यायात लुमंकुसें वय्कलं थःगु छेँय् नेवाःभाय् न्ववायेगु अनिवार्य यानातःगु जुयाः हे थौं मानन्धर समाजया दथुइ नेवाः भासं न्ववानाः थःत साय्मिया मचा धायेके खन धयादिल ।
ज्याझ्वलय् लुम्बिनी विश्वविद्यालयया उपकुलपति डा. त्रिरत्न मानन्धर, सभासद् डा. मंगलसिद्धि मानन्हर, पुलांम्ह सांसद लक्ष्मीदास मानन्धरपिंसं भिंतुना बियादीगु खः। संघया कोषाध्यक्ष बद्री नारायण मानन्धरं लसकुस यानादीगु उगु ज्याझ्वलय् दुजः सन्देश मानन्धरं सुभाय् बियादीगु खः। ज्याझ्वलय् सांस्कृतिक ज्याझ्वः नं जूगु खः ।
