अपराधीतय्त पार्टीतय् खुल्ला संरक्षण

देय्या शान्ति सुरक्षाया बारे सहलह यायेत धौख्यलय् जूगु सुरक्षा भेलाय् थीथी लागाया अपराधीतय्त राजनीतिक पार्टीतय्सं संरक्षण बीगु यानाच्वंगु कारणं शान्ति कायम यायेत थाकुयाच्वंगु बारे थीथी जिल्लाया सीडीओतय्सं गृहमन्त्रीयात जानकारी याःगु दु। अपराधीतय्त राजनीतिक पार्टीया नेतातय्सं संरक्षण बीगु यानाच्वंगु आःया खँ मखु। जेलय् कुनातःपिं गुण्डातय्त चुनाव त्यल कि पार्टीया दवावय् त्वःतीगु व उमित वहे पार्टीया नेतातय्सं थःपिनि चुनावय् प्रयोग याकेगु ज्या न्हापा नं जुयाच्वंगु खः। आः थ्व समस्या थनं नं तःधं जुयाः अज्याःपिं गुण्डातय्त संरक्षण बीगु जक मखु उमित आः पार्टीइ हे दुकयाः थीथी विभागय् तयाः ज्या याकेगु क्रम तकं शुरु जूगु दु। थुकिं यानाः अपराधय् पार्टीं ल्हाः तयेगु मखु कि पार्टी स्वयम हे अपराधीकरण जुजुं वना बिउगु दु। गुण्डातय्त पार्टीइ दुकयाः थीथी त्वाःया स्थानीय डनतय्त ल्हातय् कायेगु व उमित ठेक्का पट्टाया ज्या ज्वंकाः थःगु पकड दुने तया तयेगु संजाल पार्टीतय्सं दयेका तःगु दु। थुकिं यानाः शान्ति सुरक्षाय् छुं नं कथंया खलल वल धाःसा सुयातं ज्वनाः कारवाही यायेत तकं थाकुयाच्वंगु अवस्था देशय् दु। नकतिनि विराटनगरय् छम्ह पत्रकारयात हमला यायेगु ज्याय् एमाले समर्थित युथ फोर्सया ल्हाः दु धइगु खँ पिहां वःगु व हमलाया योजना दयेकूम्ह पर्शुराम बस्नेतया पृष्ठभूमि स्वयेगु खःसा देशय् अपराध गय् यानाः वृद्धि जुयाच्वन धइगु खँ अथें हे प्रष्ट जुइ। थ्वहे प्रवृत्ति माओवादीइ नं उतिकं दुसा कांग्रेसय् नं छुं भचा दु।
राजनीतिक पार्टीतय्सं थज्याःगु 'डबल स्टाय्ण्डर्ड' प्रवृत्ति मत्वःतूतले समाजय् शान्ति वइ धकाः आशा मयाःसां जिउ ।

More Stories Like this