ठमेल

सुजिता माःजु

सुजन + सुदा । थौंसिबें खुदँ न्ह्यःनिसेंया त्यपूजीवन । इमिगु त्यपूजीवनय् ल्वापुया ग्रहणं गबलें मथ्यू । निम्हसिया न्ह्याबलें न्ह्यूख्वाः । त्यपूजीवनय् मतिनाया अचूक नमूना । लैला मजनुया परिस्कृत व परिमार्जित क्वातुगु मतिनाया आधुनिक किपा । सकलें अजू चाः ।
काय् व भौया दथुइ क्वातुगु, ग्यसुलाःगु मतिना अले भौया व्यवहार, सदाचार खखं माजुबाःजु नं दंग । माजुबाःजु धाःसा न्ह्याबलें कचमच । इमि दथुइ न्ह्याबलें थ्व हे सम्वाद -

- 'जिं ल्ययाम्ह भौ ।'
- 'गन छिं ल्यःम्ह, जिं ल्ययाम्ह का ।'
- .....................

अनिर्णयया बन्दी माजुबाःजु ।

सुजन व सुदा ठमेलय् ।
न्हापा जूसा ध्वं हाःवइगु थाय् । थौंकन्हे विदेशी डलर मुंकीगु पर्यटकीय स्थल । सुजनया पाजु ठमेलया भगवान बहालय् । बहालय् दुहाँ वनेथाय् लाक्क हे अत्याधुनिक 'रेष्टुरेण्ट एण्ड बार ।'
- 'व ल्यासें छन्त स्वयाच्वन खं ला ।'
- 'छित जकं स्वयाच्वनका, मिखा भाय् याःथें च्वं छित, छु खः ?'
- 'अज्याःपिसं मिखा भाय् याःसां छु मयाःसां छु । जितः छु पाइ । इमिगु जालय् तक्यनीम्ह मखु थें । इमिसं ला न्हापां हय्की, धेवा स्वाय्की अले नांगां यानाः लँय् थसः पाय्की का मखु ला ?'
- 'इमिसं अथे याइ धकाः छिं गथे स्यूगु ले ? इमिगु बारे जि ला अनभिज्ञ का ।'
सुजन व सुदा निम्हं रेष्टुरेण्टया लुखाय् दनाच्वंम्ह व हे खय्निचा ख्वाःवःम्ह मिसायात तुइँतुइँ स्वस्वं भगवान बहालय् दुहाँ वनी ।

सुजन छेँय् दुहाँ मवःगु थौं निन्हु दत । छेँय् बालंच्वनाच्वंपिं व त्वालय् च्वंपिं सकसिगु म्हुतुइ छता हे खँ - 'सुजन ग्वः, गन वन ?'
सकलें सुजन मालेगु तल्लीनय् - समाचार न्यंपिं, समाचार ब्वंपिं, समाचार स्वःपिं । फुक्क समाचारं छता हे जक मन्त्र न्यंकाच्वंगु दु - दुर्घटना, अपहरण, हत्या । हत्या, दुर्घटना व अपहरणय् जकं सुजन मलाः ला । सकसिगु न्हाय्पं तिंतिंस्वाः । सुजनया मांबाःपिं ख्वख्वं बनावनी, म्हुतुइ लः थनाबी, होसय् वइ, हाकनं बनावनी । ख्वय्गु व बनावनीगुया निरन्तरता । सुदा - ख्वय् न न्हिले । माजुबाःजुयात हय्केगु ला कि थः नि ख्वय्गु - म्हस्यू तास्यूपिं धाक्वसिथाय् सुदां फोन याय्गु मत्वःतु । सकसिगु छगू हे लिसः -'मखना, मस्यू ।'
सुदाया मानसपटलय् सुजनया स्वता खँ घ्वात्तुघ्वावल ।

छगू घटना
खँ तन्हु मदुनि । सब्बु चा । सुजन व सुदा निम्हतिपु निखे फस्वया द्यनाच्वंगु । उघ्रिमय अनायास हाःसः ताय्दत -
- 'तिम्रो अनुहार काटीकुटी मेरी उनी .........सित मिल्छ । त्यहीं आँखा, त्यहीं नाक, बोली पनि उस्तै, साँच्चै तिमी ............।'
सुदाया झसंग न्ह्यल चाल । सुजन न्ह्यलय् हाःगु कि ज्वलय् हाःगु वइत भ्रम जुल ।
- 'छु जुल छित, सुनापं खँ ल्हानादियागु ?'
सुदाया न्ह्यसः सब्बु चा नापं तनावन । सुजन मदं द्यंगु द्यन । सुदां नं हाकनं थनेगु कुतः मयाः । निम्हं द्यन ।

निगू घटना
थ्व घटना धाःसा इलय् ब्यलय् न्ह्याबलें जुयाच्वनीगु ।
बहनी बेली सिधय्का कुहाँ वय्वं सुजन फेसबुकय् ब्यस्त । भान्छाया ज्या फुक्क क्वचाय्का सुदा क्वथाय् दुहाँ वलकि फेसबुक बन्द याइगु ।

स्वंगू घटना
छन्हु सुदा भान्छाय् च्वनाच्वंबलय् सुजनं सन्ध्या टाइम्स न्हिपौ स्वस्वं धाल ।
- 'छं स्यूला ? न्हापांम्ह मतिनामियात गुबलें नं ल्वमनी मखु हँ । खुइदँ/खुइन्यादँ दुपिं सच्छिम्ह मिजंतय्के मतिनामिया बारे न्यंगु न्ह्यसलय् गुइन्याम्हसिनं ला थौंतकं न्हापांम्ह मतिनामि ल्वःमंके मफुगु दुःख प्वंकल हँ ।
- 'खः नि मतिना धैगु ल्वःमंकेत याइ ला ।
सुदां नं खँ मुइकल ।

थौं सुदां स्वंगुलिं घटना लुमंकाच्वन । म्हिगः तक छु नि छु थें च्वंगु स्वंगुलिं घटना थौं च्वापुगुँ थें च्वका लुयाः तियाच्वन । स्वंगुलिं घटनाया स्वापू स्वाय्गु कुतः यानाच्वन । सुदाया न्ह्यःने छम्ह अमुर्त मिसाया किचः थिंग दंवयाबिल । सुदां क्वछित - सुजनया पिने मिसा दु, पक्का नं दु ।

न्हिनय् फोन वल ।
- 'हजुर ! यो सुजनको घर हो र ?'
- 'सुजनको घर हो, भन्नुस न सुजनको केही खबर पाउनु भयो ।'
- 'हजुर म हनुमानढोका प्रहरी कार्यालयबाट ।'
- 'प्रहरी कार्यालयबाट ?'
- 'हजुर अस्ति ठमेलको रेष्टुरेण्टहरुमा छापामारेका थियौं । त्यहीं सुजनलाई पनि रंगे हात पकड्यौं । हिजै घरको फोन नम्वर मागेथियौं तर सुजनले फोन नम्वर दिन आनीकानी गरेर दिएन । आज जबरजस्ती गरी फोन नम्बर लियौं । उहाँको अभिभावकहरुको सामू साछि राखी धरौटीमा छोडिदेउँकि भनेर फोन गरेको । तपाइँ को हो ?'
- ............................

प्रहरी कार्यालय ।
सुजनया ख्वाः खिउँसे च्वं । सुजनयात इन्सपेक्टरं कथिं सुसुं धाल -'ठमेलको त्यो केटी उसको पहिलो प्रेमी जस्तै छिन रे, त्यसैले मात्र छिरेको रे । को हो यसको प्रेमी । यसको बिहे त्यही उसकै प्रेमीसित गरिदिए हुन्थ्यो नि । विचरा अब त कोहीसित बिहे गर्न लायक पनि भएन । ......... ' सकलें मौन ।
सुदा, सुजनयात त्वतकेत भ्वँ मिले याः जुल । फुक्क मिले जुइधुंकाः पिहाँ वय्त्यय्का छम्ह पुलिस ब्वाँय् ब्वाँय् वया धाःवल -'हिजो वहाँको रगत परिक्षण गरे थें, त्यसको रिपोर्ट लिनुस ।' रिपोर्ट स्वस्वं सुदा ह्वाँय् ह्वाँय् ख्वल ।
ठमेलं डलर जक मखु, मृत्यु नं बीयः खनीसा ।
न्हापांम्ह मतिनामिया लुमंतिया उपहार मृत्यु नं जुइयः खनिसा ।
सुजनयात त्वतकेत वंपिं सकलें मलामि वंपिं थें च्वं । सकसिगु मिखा मनाः वः । सकसिगु म्हुतु गं ।

More Stories Like this