गृहमन्त्रीयात सीडीओतय् गुनासो

'गुण्डातय्त नेतातय् संरक्षण दु'

येँ (सन्ध्या टाइम्स)/थौंकन्हय् थीथी थासय् सक्रिय जुयाच्वंपिं 'डन' तय्त राजनीतिक पार्टीया नेतातय्सं संरक्षण बियातःगु कारणं यानाः हे उमित कारवाही मफयाच्वंगु खँ देय्या थीथी जिल्लाया सीडीओतय्सं धाःगु दु ।

धौख्यलय् नकतिनि जूगु सुरक्षा निकायतय्गु भेलाय् ब्वति काः वःपिं सीडीओतय्सं अन वःम्ह उपप्रधान लिसें गृहमन्त्री कृष्णबहादुर महरायात थ्व गुनासो प्वंकूगु खः।
थौं संसदया राज्य व्यवस्थापन समितिइ वनाः बयान बीगु झ्वलय् गृहमन्त्री महरां थ्व खँ कनादीगु खः। समितिपाखें वय्कःयात सःताः देशय् व्याप्त जुयाच्वंगु असुरक्षा व अशान्ति मदयेकेगु लागिं छगू कार्ययोजना दयेकाः निवाःया दुने हे लागू याये माल धकाः निर्देशन बिउगु खः। अन हे थःगु खँ कनेगु झ्वलय् वय्कलं समाजय् गुण्डागर्दी याइपिं मनूतय्त राजनीतिक पार्टीतय्सं हे संरक्षण बियाच्वंगु खँ सीडीओतय्सं कंगु जानकारी बियादीगु खः। उकिं यानाः नं कारवाही यायेत मछिनाच्वंगु दुःख वय्कलं प्वंकादीगु खः।

गृहमन्त्री महरां माथिल्लो कर्णाली जलविद्युत परियोजनाया ज्यायात सुरक्षा बीगु लागिं नेपाली सेना परिचालन यायेगु धकाः वःगु खँयात कयाः नं आपत्ति प्वंकादिल। सरकार व माओवादी दथुइ जूगु वृहत् शान्ति सम्झौता कथं नेपाली सेना व जन सेना निगुलिंयात आः गनं हे परिचालन याये मजिउगु कारणं अन आःयात सशस्त्र प्रहरी निं परिचालन यायेगु व मफुत धाःसा जक सेना छ्वयेगु खँ कनादीगु खः ।