नेपालय् सार्कस्तरीय समलिंगीतय् न्हापांगु शेल्टर
येँ (सन्ध्या टाइम्स)/विदेशं वःपिं समलिंगीतय् इहिपा तकं याना बीधुंकाः आः नेपालय् दक्षिण एशियाया हे न्हापांगु 'समलिंगी शेल्टर' चायेकेगु तयारी शुरु जूगु दु ।
समलिंगी व तेस्रोलिंगीतय् अधिकार रक्षाया लागिं सक्रिय जुयाच्वंगु आपालं गैरसरकारी संस्थातय्सं नेपालय् ज्या यानाच्वंगु दुसां थीथी ख्यलं पीडितपिं समलिंगी/तेस्रोलिंगीतय्त सुरक्षा बीगु शेल्टर हे चायेकेत्यंगु धाःसा थ्व न्हापांखुसी खः ।
नेपालय् सतकय् लानाच्वंपिं मस्तय् सुरक्षा याइगु शेल्टर दु, विदेशं बचे याना हःपिं मिस्तय्त सुरक्षा बीगु शेल्टर दु, तर पीडित समलिंगी/तेस्रोलिंगीतय्त सुरक्षा बीगु शेल्टर धाःसा मदु। आः तक थज्याःगु शेल्टर दक्षिण एशियाया गुगुं नं देशय् मदुनि। नेपालय् अज्याःगु शेल्टर चायेकाः समलिंगी/तेस्रोलिंगी जूगु हे कारणं पीडित जुयाच्वंपिं दक्षिण एशियाली मुलुकया मनूतय्त तकं थन हयाः सुरक्षा बीगु ताः तयाः थ्व शेल्टर दयेकेत्यंगु खँ सीदुगु दु ।
थ्व शेल्टर समलिंगी/तेस्रोलिंगीतय् संस्था ब्लु डायमण्ड सोसाइटीं दयेकेत्यंगु दु। उकिया लागिं येँया धुम्बाराहीइ न्यातँजाःगु छेँ दनेगु ग्वसाः जुयाच्वंगु खँ सोसाइटीया नायः लिसें सभासद् सुनिलबाबु पन्तं कनादीगु दु ।
बंगलादेश, पाकिस्तान, अफगानिस्तान थेंज्याःगु देशय् समलिंगी जुइगु तसकं ग्यानापु। थज्याःपिं मनूतय्त अन मृत्युदण्ड तकं बीगु सम्भावना दु। उकिं थःगु परिचय खुले यानाः म्वाये चाहे जूपिं दक्षिण एशियाली समलिंगी/ तेस्रेलिंगीतय् सुरक्षाया लागिं थःपिंसं नेपालय् अज्याःगु शेल्टर चायेकेत्यनागु खँ भाजु पन्तं कनादिल ।
थ्वहे वइगु झिंन्यालाया दुने अज्याःगु शेल्टर चायेकेगु ताः दुसां थुकिया लागिं ध्यबाया समस्या जुयाच्वंगु खँ वय्कलं कनादिल। थ्व ज्याया लागिं करिब छगूत्या करोड ति दां तुइगु खँ नं वय्कलं कनादीगु दु ।
नेपालय् पुष्पकमल दाहाल (प्रचण्ड) प्रधानमन्त्री जूगु इलय् समलिंगी/तेस्रोलिंगीतय् निंतिं सरकारं हे बजेट बीगु शुरु याःगु खःसा आः वयाः अदालतपाखें नं थ्व समुदाययात मान्यता बीमाःगु निर्णय यासें उमि दथुइ जुइगु इहिपायात वैध ठहर यायेगु फैसलात याना हयाच्वंगु दु ।
