सिमिकोटय् विमान दुर्घटना

येँ (सन्ध्या टाइम्स)/नेपालगन्जं थौं सुथय् कार्गो ज्वनाः हुम्लाया सिमीकोटपाखे वंगु तारा एयरया विमान दुर्घटना जूगु दु। सुथय् ८:१५ बजे नेपालगञ्ज विमानस्थलं खाद्यान्न ज्वनाः वंगु तारा एयरया ९ एन ए जि क्यु डोर्नियर विमान डाउन ड्राफ्टय् हेभि ल्याण्डिंग याःगु इलय् दुर्घटना जूगु खः। रनवेपाखें पिहांवंगु विमानया न्ह्यःनेया ब्व व पा क्षति जूगु खँ नेपालगञ्जया नागरिक उड्डयन प्राधिकरणं धाःगु दु। विमानय् दुपिं चालक दलया स्वम्हं सकुशल दु। विमानय् क्याप्टन बोधराज निरौला, सहायक क्याप्टेन एमएम श्रेष्ठ व परिचारिका डि जोशी सकुशल दुगु खँ धाःगु दु। थ्व हे झ्वलय् म्हिगः बहनी बुद्ध व यति एअरलाइन्सया निगः जहाज सर्गतय् हे ल्वानाः तःधंगु दुर्घटना जुइगुपाखें बचे जूगु खः। येँनं भैरहवा वंगु बुद्ध एअरया एटिआर व भैरहवां येँय् वःगु यति जेटस्ट्रिम जहाज भैरहवा सिबें च्वय् ल्वायेत्यंगु खः ।