नेवाःयात दलितय् मतयेत ज्ञापन पौ
येँ (सन्ध्या टाइम्स)/नेवाः समाज दुनेया खुगू जातियात दलितया धलखय् दुथ्याकेगु कुतः यानाच्वंगु खँयात कयाः आपत्ति प्वंकुसें थौं सभामुख सुभाष नेम्वाङयात छगू ज्ञापनपौ लःल्हात ।
राष्ट्रिय दलित आयोग विधेयकय् नेवाः दुनेया द्यःला, पोडे, च्यामे, कपाली, कुस्ले, खड्गी व कसाइँ दलित खः धकाः न्ह्यथनातःगु दु। उगु विधेयक आः व्यवस्थापिका संसदय् हयेगु निंतिं मन्त्रिपरिषद्य् पेश जुयाः सभामुख नेम्वाङया नेतृत्वय् दुगु विधेयक समितिइ विचाराधीन अवस्थाय् लानाच्वंगु दु। थःपिं दलित मखु धकाः स्वयं नेवाः दुनेया सम्बधित जातीय खलः पुचःतय्सं हे धया वयाच्वंगु दुसा थ्वहे खँयात कयाः थौं सभामुखयात ज्ञापनपौ लःल्हाःगु खः। नेवाः स्वायत्त राज्यया नितिं संघर्ष याना वयाच्वंगु नेवाः स्वायत्त राज्य मंकाः संघर्ष समितिया नेतात, नेवाः दुनेया सम्बन्धित जातीय खलः पुचःया प्रतिनिधित नापं संसदय् दुथ्यानाच्वंगु थीथी कथंया राजनीतिक पार्टीया नेवाः सभासद्त न्हूबानेश्वरया संविधानसभा भवनय् हे वनाः ज्ञापनपौ लःल्हाःगु खः। उगु प्रस्तावित राष्ट्रिय दलित अधिकार आयोग विधयकय् नेवाः दुनेया खुगू जातियात दलित धकाः दुथ्याकातःगु खँय् एमालेया सभासद् डा. मंगलसिद्धि मानन्धरं नेवाः दुनेया जातियात दलितया धलखय् लाके मजिउ धकाः संशोधन प्रस्ताव नं पेश यानादीधुंकूगु दु ।
