माओवादी दुने तीव्र गुटबन्दी

न्हूपिं नेता कार्यकर्ता अलपत्र

येँ (सन्ध्या टाइम्स)/संविधानसभाया दकलय् तःधंगु दल एकीकृत माओवादी दुने स्वम्ह शीर्ष नेतातय्गु स्वंगू लाइन कथं 'गुटबन्दी' ब्यापक रुपं जुयाच्वंगु इलय् मेमेगु पार्टी त्वःताः माओवादीइ दुहां वःपिं न्हूपिं नेता व कार्यकर्तात धाःसा अलपत्रय् लाः वंगु खँ सीदुगु दु ।

माओवादी अध्यक्ष प्रचण्ड, उपाध्यक्ष मोहन बैद्य किरण व डा. बाबुराम भट्टराई यानाः स्वंगू लाइन दुगु अले लाइन संघर्ष जुयाच्वंगु इलय् माओवादी पार्टीइ न्हू दुहां वःपिं कार्यकर्ता व नेतातय्त समस्या ब्वलंगु खँ माओवादीया छम्ह नेतां स्वीकार यानादीगु दु। पार्टी दुने न्हापांनिसें थःथःपिं लिक्क लाःपिं नापं विचाःनाप लिक्क लाःपिं कार्यकर्तात छम्ह छम्ह नेताया पँ लिनाः क्वय् थ्यंक हे गुटबन्दीइ वनेधुंकूगु कारणं थीथी कम्युनिष्ट पार्टीपाखें माओवादीइ दुहां वःपिं नेता व कार्यकर्तात धाःसा सुं नं नेताया पक्षय् मलासे अलपत्रय् लाः वंगु खँ धाःगु दु। विशेष यानाः न्हापांनिसें हे माओवादी नेता व कार्यकर्ता जुयाच्वंपिं थःथःगु लँ लिनाः पार्टीया क्वय्या तह नगरपालिकाया वडा अले गाविसय् तकं गुटबन्दी याना वनाच्वंगु दु ।

अथे पार्टी दुनेया लाइन संघर्षया नामय् गुटबन्दी जूगुलिं आःया अवस्थाय् पार्टी संचालनया विधि हे न्हूगु कथं यंकेमाःगु आवश्यकता महसुस यानाः थीथी राजनीतिक पार्टीया नेता कार्यकर्ता जुयाः नं लिपांगु इलय् माओवादी लिसे एकता यानाः दुहां वःपिं नेता व कार्यकर्तातय्सं थःपिनिगु नं ब्यागलं कथंया भेला तकं यानाहःगु दु। थौं पार्टीया स्थायी समितिया मुँज्या च्वनीगु नापं कन्हय्निसें केन्द्रीय कमिटीया बैठक च्वनीगु जुयाः पार्टीया नेतृत्वयात अथे गुटबन्दी याःगुया विरोध यासें सकसितं छगू हे थासय् तया यंकीगु पार्टी संचालन विधियात तकं हीकेमाल धकाः प्रस्ताव तयेगु नितिं अथे ब्यागलं कथंया भेला म्हिगः येँया छगू थासय् गोप्य रुपं च्वंगु खँ सूत्रं धाःगु दु। उगु भेलाय् माओवादीया पोलिटब्यूरो दुजःनिसें जिल्ला स्तरया कार्यकर्तात तकं दुथ्याःगु खः ।

माओवादी पार्टी दुने थुगु कथंया स्वंगू लाइन संघर्षयात विचार समूहया रुपय् परिभाषा बीगु कुतः यानाहःगुलिं हे अथे ब्यागलं ब्यागलं बिचार समुह जूसां छगू थासय् हे च्वनीगु कथंया पार्टी संचालन विधि लुइकेमाः धकाः न्हूपिं नेता व कार्यकर्तातय्सं बः बियाहःगु खः। थौंकन्हय् नेतात मिले यायेगु ज्याय् नं थुपिं हे सक्रिय दु ।