बुरा जुइकाः मेम्ह कलाः हःम्ह एमाले नेतायात गामं पितिन

येँ (सन्ध्या टाइम्स)/बुरा जुइकाः मेम्ह कलाः हःम्ह गोरखाया एमालेया स्थानीय नेतायात स्थानीय मनूतय्सं गामं पित्युंगु दु। ७२ दँ दुम्ह एमालेया स्थानीय नेता रेशमबहादुर बानियायात अथे गामं पितिना हःगु खः।
गोरखाया पृथ्वीनारायण नगरपालिका वडा नं. ११ या एमाले नेता रेशबहादुरयात छगू कथं अन एमालेया वरिष्ठ नेता धकाः तकं माने याना वयाच्वंगु खःसा आः थःहे ससःकेहेँ धायेमाःम्ह २६ दँया सुशीला पाण्डेयात मेम्ह कलाः कथं छेँय् दुत हयेवं स्थानीय मनूतय्सं निम्हतिपुलिंयात गामं पितिना हःगु खः ।

गामय् च्वंपिं मनूतय्सं पितिना छ्वयेवं इपिं निम्हं हे गां त्वःताः खुरुखुरु पिहांवंगु खँ स्थानीय मनूतसं धाःगु दु। लिथु जुयाः दुहां वःम्ह सुशीला पाण्डे जिल्लाया हे मिरकोट गाविसय् च्वंम्ह खः। वानियाँ एमालेया वरिष्ठ नेता केपी शर्मा ओली पक्षधर स्थानीय नेता खः। वय्कः न्हापा स्थानीय चुनावय् वडा अध्यक्ष पदय् त्याकाः ज्या यायेधुंकूम्ह खः। बानियाँया निम्ह काय् व छम्ह म्ह्याय् दुसा छम्ह काय नेपाली सेनाया वहालवाला पदाधिकारी खः।बानियाँया न्हापायाम्ह कलाः मिन कुमारी खः।
मिनकुमारीं ताः ई न्ह्यवंनिसें हे थः भाःत रेशमबहादुर बानियाँ थःत शारीरिक नापं मानसिक यातना बिया वयाच्वंगु खँ कनेगु यानाच्वंगु जानकारी स्थानीय मनूतय्सं बिउगु दु ।