उर्जा विकासय् चाला वःगु सकारात्मक कुलां

न्हूम्ह उर्जामन्त्री गोकर्ण बिष्टं आः याकनं हे देशं लोडशेडिंग चिला वनीगु आश्वासन बिसें उकिया लागिं तयारी समेत यानादीगु समाचारत पिहां वयाच्वंगु दु। उर्जाया मामिलाय् थौं नेपाःया न्हापांगु प्राथमिकता धइगु हे लोडशेडिंगं मुक्त जुइगु खः। औद्योगिक ज्याया लागिं मत उत्पादन आः थथें नेपाःमितय्सं कल्पना नं याये मफुनि। जनतायात लोडशेडिंगं मुक्त यायेगु खास तःधंगु ज्या ला मखु, तर थौं थ्वहे दकलय् महत्वपूर्ण ज्या जुयाः न्ह्यःने वयाच्वंगु कारणं उर्जामन्त्रीं उकी हे ध्यान केन्द्रित याःगु सकारात्मक खँ खः। दछि निदँया दुने हे लोडशेडिंग गय् यानाः चीके फइ धइगु 'रोडम्याप' नं वय्कलं तयार यानादीगु दु। यदि उकियात पालना यानाः न्ह्याः वने फत धाःसा थुकिं वय्कःयात सफल मन्त्री दयेकीगु जक मखु नेपाःयात नं सफल मुलुक दयेकीगु खँय् शंका मदु ।

बहुचर्चित तामाकोशी परियोजनाया शिलान्यास जुइवं आः मेमेगु परियोजना नं दयेकेगु छनक पिहां वःगु दु। जलविद्युत परियोजना दयेकेगु ज्यायात सेना हे पाः तयाः जूसां नं सुरक्षा बीगु व विगतय् दकलय् दुःख बीगु यानाच्वंपिं माओवादीं नं जलविद्युत निर्माणय् थःपिंसं पंगः थने मखु धकाः आश्वासन बिउगुलिं थुकी लगानी याइपिंत उत्साह बिउगु दु। यदि सरकार व राजनीतिक पार्टीतय्सं आः बिउगु बचं पूवंकल व लगानीकर्तातय्सं नं इमान्दारीपूर्वक ज्या यात धाःसा मेगु खुदँ न्हय्दँया दुने नेपाः विद्युत निर्यात यायेत तकं सफल जुइगु आशा याये फइ। आः जलविद्युतया ज्याय् सुनां नं राजनीति यायेगु व अतिरिक्त राष्ट्रवादी जुइगु त्वःताः यथार्थवादी जुयाः ज्या यायेमाःगु अतिकं आवश्यक दु ।

More Stories Like this