असफल राष्ट्रतय् धलखय् नेपाः

विश्वया असफल राष्ट्रतय् धखलय् नेपाः २७ औं स्थानय् लाः वंगु दु। न्हापा २६ औं स्थानय् दुगुली थुगुसी छुं भचा सुधार जुयाः २७ स्थानय् लाःगु खः। तर विश्वया मेमेगु असफल धाःगु राष्ट्रतय् धलः स्वयेगु खःसा नेपाःया थ्व अवस्था तसकं दयनीय खः। छाय्धाःसां नेपाः स्वयां नं असफल धाःगु राष्ट्रत सोमालिया, बंगलादेश, पाकिस्तानया अवस्था स्वयेगु खःसा अन राजीतिक अस्थिरता कायम जुयाच्वंगु आः मखु। थ्व देशय् ताः ई न्ह्यवंनिसें न्ह्यानाच्वंगु गृहयुद्ध, आपसी कलह आदिया कारणं यानाः उपिं धमाधम असफल जुजुं वनाच्वंगु खः। नेपाः छगू ई द्वन्द्वय् लानाः ध्वस्त जूवंगु खःसां आः नेपालय् अज्याःगु छुं नं द्वन्द्व मदु। गृह कलह नं मदु। तर नं नेपाः असफल राष्ट्रतय् धलखय् न्ह्यःने न्ह्यःने लाः वनाच्वंगु दु छाय्? थुकिया कारण थन शासन याइपिं राजनीतिक नेतातय् कुण्ठित मानसिकता खः। छुं नं कथंया द्वन्द्व मदये धुंकाः नं नेतात थः हे जक सत्ताय् वनेगु व मेगु सत्ताय् च्वंपिंत ज्या हे याके मबीगु मानसिकतां यानाः नेपालं छुं हे विकास याये मफुगु खः। धायेत ला थुकिया दोष देशय् झिदँ तक जूगु जनयुद्धयात बियाः नेतात पार जुइफु। तर थ्व दोष जनयुद्ध स्वयां नं नेतातय् मानसिकताया खः। खतुं जनयुद्ध स्वयम् हे नं थ्वहे मानसिकताया लिच्वः खः। गबलय् तक नेतातय्के थज्याःगु मानसिकता कायम जुयाच्वनी अबलय् तक देशय् न्ह्याक्व हे शान्ति कायम जुयाच्वंसां नं थ्व देय्यात असफल जूवनीगुपाखें सुनां नं पने फइ मखु। थुकिया लागिं उदारता, त्यागया भावना व राष्ट्रप्रतिया गहन मतिना दकलय् मदयेकं मगाः ।

More Stories Like this