पूँजी बजारय् प्यन्हुया दिं नं सुधार

येँ (झीगु स्वनिगः)

नेपाल स्टक एक्सचेन्जय् छक्वःपतिकं प्यन्हुया दिं नं नेप्सेय् सुधार जूगु दु । मङ्गलबाः नेप्सेय् जूगु कारोबारय् नेप्से न्हापाया दिंया तुलनाय् झिंस्वंगू दशमलव पीन्यागू ल्याःया सुधारलिसे स्वसः व पीप्यंगू दशमलव नीनिगूया बिन्दुइ थ्यंगु दु । थ्व प्यन्हुया दिंसं नेप्से थ्यंमथ्यं न्यय्गू ल्याखं थहांवंगु खः । नेप्सेय् छक्वःपतिकं वःगु गिरावटं स्वसः स्वयाः अप्वः क्वय् निसः व गुइनिगू ल्याः थ्यंगु खः ।
थहांवनाच्वंगु नेप्सेय् मङ्गलबाःया सुधार लगातार प्यन्हुया दिंया खः । कारोबार रकमया हिसाबं नं प्यंगू करोड झिंछगू लखया हाराहारीइ शेयर न्याये मीगु ज्या जूगुलिं नं बजाः तसकं सन्तोषजनक ढङ्गपाखें न्ह्यःने न्ह्याःगु विज्ञतय्सं जानकारी ब्यूगु दु । नेप्से अस्वाभाविक रुपय् क्वय् वंगु खा अप्वःसिनं स्वीकार याःगु व बजारय् मङ्गलबाः नं उच्च माग अझ खनेदुगुलिं वइगु दिंसं थ्यंमथ्यं प्यसःया बिन्दुइ नेप्से थ्यनीगु धुकुमाः बजारय् यानाः वयाच्वंगु दु ।

नेप्सेय् मङ्गलबाःया कारोबारय् ख्वीच्यागू कम्पनीया च्यासः व स्वीन्यागू कारोबारपाखें छगू लख निद्वः व न्हय्च्याकू कित्ता शेयरया कारोबार जुयाः प्यंगू करोड झिंछगू लख न्यय्गुद्वः व प्यसः व च्यय्नितका बराबरया शेयर न्याये मीगु ज्या जूगु दु । शेयर बजारय् वःगु गिरावटया कारण बजाःयात स्वाभाविक अवस्थाय् थ्यंकेत सरकारं ठोस पलाः न्ह्याकेगु प्रतिबद्धता नं वःगु दु । बैङ्क लिसे वित्त कम्पनीतय्गु वर्चश्व दुगु नेपाली शेयर बजारय् उगु क्षेत्रं बिइगु प्रतिफल नं उच्च हे दुगुलिं नं बजाः थहांवंगु लगानी कर्तापिनिगु धापू दु ।

More Stories Like this