असफल जुजुं वन आयोजनात

चितवन (झीगु स्वनिगः)

चितवनया थीथी क्षेत्रय् न्ह्यानाच्वंगु आयोजनात असफलतापाखे उन्मुख जूगु दु । ग्रामीण पुनर्निर्माण लिसे पुनस्र्थापना आयोजना अन्तर्गत सञ्चालित नीन्यागू करोडया आयोजना दुसां नं आःतक्क उकिया बच्छि धेबा नं खर्च जूगु मदुनि । प्यदाया इलय् आयोजनां चितवनय् निगू सतक झिंछगू खानेपानी आयोजना व झिंनिगू झोलुंगे ताा निर्माण यायेगु लक्ष्य तःगु खः । तर, आःतक्क वनकट्टा बगइ सतक खण्ड अन्तर्गत वनकट्टानिसें कल्याणपुरया रिमाल खुसितक्क कालोपत्रे यायेगु ज्या न्ह्यानाच्वंगु दु । तर दारेचोक शक्तिखोर सतक खण्डया निर्माण ज्या थें अझ नं न्ह्यायेफुगु मदुनि ।

अथेहे दारेचोकया चुम्लिङ्गटार व शक्तिखोरया गैराबारीइ खानेपानी आयोजना निर्माण जूगु जूसां नं लोथरया कालीखोला व रेवतीखोला, दाहखानीया टारीगामय् जक झोलुंगे ताा दयेके धुंकूगु दु । लक्ष्य कथं ज्या यायेमफुगुलिइ आयोजनाया प्रमुखत छक्वःपतिकं परिवर्तन जुइगु, राजनीतिक सहमति कायम यायेमफुगु हे मुख्य कारण जूगु आयोजनाया प्रमुख समर खनालं जानकारी बियादिल । वय्कलं इलय् हे ज्या यायेमफुगु स्वीकार यानादिसें आः तदारुकताया लिसे ज्या यायेगु नितिं प्रतिबद्धता प्वंकादिल । चितवनया स्थानीय विकास अधिकारी वसन्त अधिकारीं आयोजनाया ज्या प्रभावकारी दयेकेत इनाप यानादिल । चितवन क्षेत्र नम्बर - ४ पाखें संविधानसभाय् प्रतिनिधित्व यायेत सभासद् चित्रबहादुर श्रेष्ठं विकास निर्माणया ज्याय् थःम्हं गुलिफु उलि ग्वाहालि यायेगु जानकारी बियादीगु खः । देय्या नीगू जिल्लाय् सञ्चालित ग्रामीण पुनर्निर्माण लिसे पुनस्र्थापना आयोजना सन् २००८ निसें सञ्चालित आयोजना खः । थुकिया समयावधि क्वचायेत दच्छि ई हे मल्यने धुंकाः नं क्वःछिनातःगु आयोजना असफल जुइगु लगभग पक्का पक्की जूगु खः ।

More Stories Like this