ग्वाहालि मवीगु ख्याच्वः

एशियाली विकास वैंकं नेपाःया सरकारयात शैक्षिक क्षेत्रय् तत्काल सुधार व थुकिया नितिं माःगु कानूनी व्यवस्था मयात धाःसा नेपाःयात वी धाःगु ५० मिलियन डलर -नेपाली ३ अर्ब, ६० करोड) ध्यबाया ग्वाहालि मवीगु ख्याच्वः व्यूगु दु । एशियाली विकास वैंकं नेपालय् विद्यमान शैक्षिक अवस्था अन्तराष्ट्रिय स्तरया मजूगु व थुकिया नितिं तत्काल वर्तमान शैक्षिक व्यवस्थाय् सुधार यायेमाःगु धयावःगु खः । थुकियानितिं वर्तमान शैक्षिक तहयात परवर्तन यानाः छगू तहनिसें च्यागू तक्क आधारभूत तह धायेगु व च्यागूगु तहनिसें झिंनिगू तक्क माध्यमिक तहकथं विकास यायेत्यंगु खः । सन् २०१२ तक्कया दुने तह परिवर्तन व कानुनी व्यवस्था तकं मिलय् याये माःगु अवस्थाय् नं सरकारी स्तरं छुंहे मजुयाच्वंगु इलय् चिउताः कयाः एशियन विकास बैंकया एशिया स्वइम्ह महानिर्देशक सुल्तान इफिज रहमानं वंगु सोमवाः उपप्रधान लिसें अर्थमन्त्री भरतमोहन अधिकारी व अर्थ सचिव कृष्णहरि वास्कोटापिन्त नापलानाः उगु खँ तःगु खः । उगु ध्यबा वीगु खँय् धाःसा नेपाः सरकार व एशियन विकास बैंकया दथ्वी न्हापांहे सम्झौता जुइधुंकूगु खः ।

नेपाःया थुगु मगाःमचाः प्रति एशियन विकास बैंक आपत्ति यानाः असन्तोष प्वंकूगुयात उलि गम्भीर ढंगं काःगु खनेमदु । थुयास्वयाः न्ह्यः सम्पत्ति शुद्धिकरणया घटना नं दोहरेजुइ धुंकूगु हे खः । अन्तराष्ट्रिय ख्यलय् बचं वियाः नं उकियात पालन मयायेगु छगूकथं नेपालं रेकर्ड तयेत ताःलाःगु दु । बचं वीगु, विश्वास याकेगु अले उकियात पूमंकेगु छगूकथंया ल्वय् जूगु दु । थुगु योजना कार्यान्वयनय् वन धाःसा थौंकन्हय्या ं२ शिक्षा माध्यमिक तहलय् वनीगु जुइ । विद्यमान शैक्षिक स्तर थकायेत व शिक्षायात गुणस्तर थकायेत थथ्य यायेत्यंगु खः । थुकिया नितिं उपप्रधान लिसें, अथंमन्त्री भरतमोहन व शिक्षामन्त्री गंगालाल तुलाधरया दथ्वी खँ ब्याके धुंकूगु धाःगु दु । तर शैक्षिक ख्यलय् सकृय शिक्षा विद्तय्गु ग्वाहालि व सुझाव कायेगु ज्याय् धाःसा सरकार उलि सकारात्मक मजूगु कारणं समस्या वयाच्वंगु अनुमान याःगु दु ।

एशियन विकास बैंकं नेपाःयात थीथी क्षेत्रय् ग्वाहालि वियावयाच्वंसा आः वयाः शिक्षा व उर्जाया ख्यलय् लिकुंगु दु । नेपाः उर्जा संकटय् लानाच्वंगु व थुकिया क्षेत्रय् लगानी अप्वयेकेगु स्वयाच्वंगु सन्दर्भय् एशिएन विकास बैंकं नं नेपाःयात ग्वाहालि यायेगु मू क्षेत्र हे उर्जा कथं काःगु दु । तर थनया सरकारया उदासिनता व कानुनी प्रकृयाय् वयाच्वंगु सिथिलतां उगु बैंकं असन्तोष प्वंकाः वयाच्वंगु दु । शिक्षाया क्षेत्रय् बी धाःगु ग्वाहालि नं वइगु सन २०१२ तक्कया दुने नेपाल सरकारं सन्तोषजनक वातावरण दयेके मफत धाःसा ५० मिलियन डलर ध्यबां वञ्चित जुइमालेफु ।

More Stories Like this