सिटौलायात कठघराय् थनेत कांग्रेस नेतातय्गु माग

पार्टीं अपराधीयात संरक्षण मयाइगु युवा नेतातय्गु धापू

येँ (झीगु स्वनिगः)

प्रमुख प्रतिपक्ष दल नेपाली कांग्रेसया युवा नेता गगन थापां थःगु हे पार्टीया महामन्त्री कृष्णप्रसाद सिटौलायात कानुनया कठघराय् थनेमाः धकाः धयादीगु दु । अपराधीत न्ह्यागु हे पार्टीयाम्ह जूसां उन्मुक्ति बिइ मज्यू धयादिसें सुडान घोटाला काण्डय् संलग्न दुम्ह कांग्रेसया प्रभावशाली नेतातय्त नं उन्मुक्ति बिइ मज्यू धयादिसें नेता थापां अथे थःगु हे पार्टीया महामन्त्री सिटौलायात कानुनया कठघराय् थनेमाः धकाः धयादीगु खः । म्हिगः बुधवाः येँय् जूगु छगू ज्याझ्वलय् न्वंवासें कांग्रेसया सांसद नापं युवा नेता थापां सुडान घोटाला काण्डय् आरोपीततय्त गुगु नं हालतय् कठघराय् थनेमाः धयादिसें यदि उगु विषययात कयाः पार्टीं बचे यायेत स्वल धाःसा पार्टी दुने हे च्वनाः प्रतिबाद यायेगु जुइ धकाः तकं धयादिल ।

अपराध व अपराधीया छुं नं जात व पार्टी दैमखु धयादिसें वय्कलं छुं पार्टीया मनू जुल धायेवं उन्मुक्ति बिइ मज्यू धकाः बहः बियादिल ।दण्डहीनता कायम जुयावन धाःसा लिपा लिपा नं अज्वःगु घटना जुइ धयादिसें सुडान घोटाला काण्डय् प्रहरीं राजनीतिक गुटबन्दीविरुद्ध न्वंमवायेगु खःसा प्रहरी संगठन हे विघटन जुइ धकाः नेता कांग्रेसया नेता थापां ख्याच्वः तकं बियादिल ।अथे हे कांग्रेसया केन्द्रीय नेता आनन्दप्रसाद ढुंगानां सुडान घोटाला काण्डय् अख्तियारं पार्टीया नेता कृष्णप्रसाद सिटौलायात दोषी ठहरयात धाःसा पार्टीं संरक्षण यायेगु जुइमखु धकाः धयादीगु दु ।नेता ढुंगानां कांग्रेसया नेतृ सुजाता कोइरालाया जिलाजं विदेशी नागरिक रुबेल चौधरी नं भ्रष्टाचारय् संलग्न जूगु पुष्टि जुल धाःसा पार्टीं संरक्षण यायेगु जुइमखु धकाः धयादीगु दु । ख्वपय् म्हिगः बुधवाः रफत संचार क्वलबं ग्वसाःग्वःगु ज्याझ्वलय् न्वंवासें वय्कलं अथे धयादीगु खः ।