'सेना समायोजन विशेष समितियात कतांमरि थें यात’

येँ (झीगु स्वनिगः)

सेना समायोजन विशेष समितिया दुजः नापं एकीकृत नेकपा -माओवादी)या नेता जनार्दन शर्मां आःया अवस्थाय् राजनीतिक दलतय्सं सेना समायोजन विशेष समितियात कतांमरि थें यात धकाः द्वपं बियादीगु दु ।
म्हिगः बुधवाः येँय् ग्वसाःग्वःगु छगू ज्याझ्वलय् न्वंवासें वय्कलं अथे धयादीगु खः । सेना समायोजन विशेष समिति थः हे निर्णय यायेफूगु हैसियत मदु धकाः नं उगु समितिया दुजः शर्मां धयादिल ।
वय्कलं धयादिल 'विशेष समिति दलया कतांमरि थें जूगु दु । नेतातय्सं धाःगु जक निर्णय यायेगु ।' सेना समायोजन समितिया दुजः शर्मां दलतय्गु कमजोर निर्णय क्षमताया कारणं विशेष समिति बदनाम जुयाः वनाच्वंगु दु धयादिसें दलतय्सं निर्णय यायेगु जिम्मा आः विशेष समितियात बिल धाःसा जक स्वन्हुया दुने हे फुक्क विवादत सहमतिइ हयाबिइ । तर नेतातय्सं उकिया नितिं हिम्मत यायेमाल ।
विशेष समितियाके थः हे स्वतन्त्र कथं निर्णय यायेगु हैसियत मदुगुलिं हे समस्या ब्वलनाच्वंगु खः धायादिसें वय्कलं व हे कारणं यानाः वंगु असार ५ गतेनिसें सेना समायोजन विशेष समितिया मुँज्याय् उपस्थिति मजुयागु खः धकाः नं स्पष्ट यानादिल । नेता शर्मां धयादिल 'थःम्हं हे निर्णय याये मफुगु कतांमरि समितिइ जि उपस्थिति जुइमखु ।'