'दलाल व गुण्डातय्त राजनीतिक संरक्षण’

येँ (झीगु स्वनिगः)

उपप्रधान नापं गृहमन्त्री कृष्ण बहादुर महरां कानूनसिबें च्वय् सुं नं मदैगु जुयाः कानून पालना यायेत नाप नापं कानुनया पालना याकेत सुरक्षा अधिकारीतय्त निर्देशन बियादीगु दु । काभ्रे जिल्लाया धौख्यलय् म्हिगः बुधवाःनिसें जूगु मध्यमाञ्चलस्तरीय सुरक्षा अधिकारीतय्गु भेलाय् न्वंवासें गृहमन्त्री महरां अथे निर्देशन बियादीगु खः । देय् राजनीतिक संक्रमणकालिन अवस्थाय् लानाच्वंगु, संविधान निर्माणया प्रक्रिया न्ह्यानाच्वंगु, थीथी कथंया भूमिगत सशस्त्र पुचःतय्सं थःपिनिगु गतिविधि तच्वयेकाः हयाच्वंगु नापं अपराधीतय्सं नं थीथी घटनात यानाच्वंगु अवस्थायात ध्यानय् तयाः आःया अवस्थाय् सुरक्षा ब्यवस्थाय् थीथी कथंया चुनौतित वःगुलिं अथे तःजिक सुरक्षा निकायलिसे सहलह ब्याकेगु ज्याझ्वः सरकारं तःगु खः ।

उपप्रधान नापं गृहमन्त्री महरां नेपाल प्रहरी/प्रशासक दुने नं भ्रस्ताचार नियन्त्रण यायेमाःगु खँय् बहः बियादिसें जनतानाप प्रत्यक्ष स्वापू दैगु प्रहरी प्रशासन दुनेया भ्रष्टाचार पनेत अधिकारीतय्त निर्देशन बियादिल । न्वंवायेगु झ्वलय् कानूनया पालना व भ्रष्टाचार नियन्त्रणय् गृहमन्त्री महरां बहः बियादिल । उपप्रधान नापं गृहमन्त्री महरां भ्रष्टाचारया प्रमुख कारण दलाल पुँजीपति खः धकाः नं धयादिल । आःया अवस्थाय् ब्वलनाच्वंगु भ्रष्टाचार न्युनीकरणया नितिं दलाल पुँजीपतिपाखें बचेजुइमाः धयादिसें गृहमन्त्री महरां दलाल व गुण्डायात राजनीतिक संरक्षण जुयाच्वंगु दु धकाः नं दावी यानादिल । अथे हे भ्रष्टाचार शून्य दयेकेगु नितिं वस्तुगत वातावरण तयार यायेमाः धकाः नं गृहमन्त्री महरां बहः बियादिल । थौं विहिवाः तक न्ह्याइगु उगु भेला न्हूगु सुरक्षा नीति तयार यायेगु नितिं धकाः गृह मन्त्रालयपाखें ग्वसाः ग्वःगु खः ।
उगु भेलाय् मध्यमाञ्चल दुनेया फुक्क हे प्रमुख जिल्ला अधिकारी, प्रहरी प्रमुख नापं स्वंगू हे सुरक्षा निकायया प्रमुख, गृह सचिव नापं उच्च सुरक्षा अधिकारीतय्गु उपस्थिति दुगु खः । भेलाय् प्रत्येक जिल्लाया सिडिओयात १०/१० मिनेट न्वंवायेगु ई ब्यूगु खः । सिडियो व प्रहरी प्रमुखतसें थःथःगु जिल्लाया सुरक्षा अवस्था, चुनौति व समस्याया बारे खँ तःगु खः ।