'सभासदतय्त याःगु निलम्बन षड्यन्त्रणूर्ण'

नेवाःतय् राष्ट्रिय संगठन नेवाः देय् दबूलिं व्यवस्थापिका संसदं नेपाः राष्ट्रिय पार्टीया सभासद् बुद्ध साय्मि लगायत प्यम्हेसित निलम्बन याःगु प्रति थःगु ध्यानाकर्षण जूगु खँ धाःगु दु ।

देय् दबूया नायः नरेश ताम्राकारं छगू विज्ञप्ति पिथनादिसें सरकारया पाखें न्हापा जूगु सहमति व सम्झौता कार्यान्वयन यायेत व आदिवासी, जनजाति, मिसा, मुस्लिम, अल्पसंख्यक व दलितय् अधिकार सुनिश्चित यायेत सरकारया ध्यानाकर्षण याःगु इलय् संसदं निलम्बन याःगु घटना षड्यन्त्रपूर्ण जूगु ठहर याःगु दु ।

विज्ञप्तिइ संविधनसभा व व्यवस्थापिका संसदं सभासद्तय्त याःगु निलम्बन लितकयाः जायज मागयात अविलम्ब सम्बोधन यायेत नं जोरदार माग यानातःगु दु । अथेहे फुक्कं आदिवासी, जनजाति, मिसा, दलित, मुस्लिम अल्पसंख्यक व ल्यूने लाःगु वर्गया हकहितया पक्षय् सभासद्तय्सं ल्ह्वनाच्वंगु माग प्रति देय् दबूलिं ऐक्यबद्धता प्वंकूगु दु ।

More Stories Like this