निलम्बित सभासदतय् अनसन

निलम्बन विरुद्ध ११ गते मसाल जुलुस व तराई बन्द

येँ (सन्ध्या टाइम्स)/जातीय समानुपातिकया आधारय् राज्यया फुक्क निकायय् प्रतिनिधित्वया निंतिं समावेशी विधयेक हयेमाःगु नापं थीथी कथंया माग यानाः सदनय् आन्दोलन यायेगु झ्वलय् निलम्बनय् लाःपिं प्यम्ह सभासद्तय्गु नेतृत्वय् थौं न्हूबानेश्वरया संविधानसभा भवन पिने अनसन च्वंगु दु ।

नेपाः राष्ट्रिय पार्टीया सभासद् बुद्ध साय्मि, दलित जनजाति पार्टीया सभासद् विश्वेन्द्र पासवान, संघीय लोकतान्त्रिक मञ्चया रुक्मणी चौधरी व स्वतन्त्र सभासद् सदरुल मियाँ हकया नेतृत्वय् थौं सुथय् ८ बजेनिसें अनसन च्वंगु खः। उगु अनसन ज्याझ्वः थौं बहनी ६ बजे तक जुइ धाःगु दु।
अनसन ज्याझ्वलय् स्वंगू दलया नेता कार्यकर्ता नापं राज्यं बहिष्करणय् लाकातःगु समुदायया प्रतिनिधितय्सं नं ब्वति कयाच्वंगु दु ।

उगु स्वंगू पार्टीया स्वम्ह सभासद् नापं छम्ह स्वतन्त्र सभासद् जानाः संघर्ष यायेगु झ्वलय् कंस १० गते येँय् भेला यायेगु, ११ गते देय्न्यंकं मसाल जुलुस नापं तराई बन्द यायेगु अले १६ गनेनिसें २० गते तक देय्न्यंकं प्रचारात्मक अभियान न्ह्याकेगु ज्याझ्वः दयेकूगु दु। थ्वहे दथुइ येँया बसन्तपुली जनसभा यायेगु तयारी नं जुयाच्वंगु खँ धाःगु दु ।

नेवाःतय् समर्थन
नेवाः स्वायत्त राज्य मंकाः संघर्ष समितिया नायः गजेन्द्र मानन्धरं थौं छगू विज्ञप्ति पिथँसें प्यम्ह सभासद्पिंत निलम्बन याःगुया विरोध यानादीगु दु। 'समावेशी विधयेक संसदय् हये माःगु लिसें आदिवासी जनजाति, दलित, मुस्लिम व मिसापिनि अधिकार न्हूगु संविधानय् सुनिश्चित जुइमाः धइगु माग यानाः सदनय् संघर्ष याना वयाच्वंम्ह नेपाः राष्ट्रिय पार्टीया सभासद् बुद्ध साय्मिलिसें प्यम्ह सभासदपिंत निलम्बन याःगुयात संघर्ष समितिं विरोध याःगु खः। निलम्वन लित कायेमाःगु माग नापं वय्कःपिंसं थौं यानादीगु अनसनयात समर्थन नं याःगु दु ।