एसएलसीया लिच्वः व बिचाः यायेमाःगु खँ

नेपाःया शिक्षा प्रणाली व उकिया लिच्वः वास्तवय् थथे हे च्वं धकाः अझ नं धाये मफुगु अवस्थाय् दनि धइगु खँ थुगुसी पिहां वःगु एसएलसीया लिच्वलं पुष्टि याना बिउगु दु। थुगुसी एसएलसी लिच्वलय् ५५.५ प्रतिशत विद्यार्थी पास जूगु ल्याः पिहां वःगु दु। एसएलसी जाँचय् पास जुइपिं विद्यार्थीतय् ल्याः ६८.४७ प्रतिशत तक थ्यनेधुंकूगु खः। छुं दँ तक थ्व ल्याः ६५ प्रतिशतया जःखः हे थहां कुहां जुयाच्वंगु खः। थुगुसी छक्वलं हे ५५ प्रतिशतय् कुहां वःगुलिं नेपालय् एसएलसी परीक्षाया लिच्वः अझ नं यथार्थपरक जुयाः पिहां वयेगु यानाच्वंगु मदुनि धइगु प्रमाणित जूगु दु। यदि थ्व लिच्वः यथार्थपरक कथं पिहां वयाच्वंगु खःसा दँय्दसं निगू स्वंगू प्रतिशत हे जक थहांकुहां जुइमाःगु खः। उकिं थुलिथुलि मछि पाक्क गय् जुयाः लिच्वः पिहां वयाच्वंगु खः, उकिया गहन विश्लेषण जुइमाःगु आवश्यता दु ।

५५.५ प्रतिशत विद्यार्थी पास जूगुया अर्थ ४५.५ प्रतिशत विद्यार्थी फेल जूगु दु। संख्याया हिसाबं थ्व लखौं विद्यार्थी फेल जूगु खत। शिक्षाविद्तय्सं थुकियात विद्यार्थीया मेहनत व अभिभावकया खर्च नितांया तःधंगु क्षति धयाहःगु दु। थुलिमछि विद्यार्थी फेल जूगुया अर्थ थ्वयां न्ह्यःने न्ह्याः वनेगु उमिगु लुखा कम से कम नं दछिया निंतिं बन्द जूगु खत। थ्व दछिया दुने उमिगु जीवनं गज्याःगु मोड काइ धाये मफु। लखौं ल्याय्म्ह जनशक्ति दिशाहिन जुइगु धइगु राष्ट्रया लागिं नं बांलाःगु खँ मखु। उमिगु भविष्यय् वइगु हानी मुलुकया भविष्यया समेत हानी खः। उकिं थुगुसीया एसएलसी लिच्वलं शिक्षाविद्त लगायत सकल सचेत समुदायं चिउताः तयाः स्वयेमाःगु खनेदु ।

More Stories Like this