गृहमन्त्री महरायात लँ पनाः पत्रकारतय् ज्ञापनपत्र
धौख्यः (सन्ध्या टाइम्स)/ मध्यमाञ्चल स्तरीय सुरक्षा भेलाय् सहभागी जुइत धौख्यलय् थ्यंम्ह उपप्रधान नापं गृहमन्त्री कृष्णबहादुर महरायात पत्रकारतय्सं लँ दथुइ हे पनाः ज्ञापन पौ लःल्हाःगु दु। कार्यक्रम जुइगु लागाया लिकसं लाःगु मिराबेल चोकय् नेपाल पत्रकार महासंघ काभ्रे शाखाया ग्वसालय् पत्रकारत सतकय् हे कुहां वयाः गृहमन्त्रीया लँ पंगु खः। पत्रकारतय्त आक्रमण याःम्हेसित ज्वनाः कारवाही मयाःगु खँय् असन्तुष्टि प्वंकुसें पत्रकारतय्सं वय्कःयात ज्ञापनपौ बिउगु खः। गृहमन्त्री महरां पत्रकारतय्गु माग प्रति थःगु पूर्ण रुपं हे समर्थन दु धासें उकिया नितिं माःकथं पलाः ल्ह्वने धयादीगु खः। पत्रकारतय्सं लँ पंगुलिं गृहमन्त्री १५ मिनेट लिपा जक ज्याझ्वलय् थ्यंके फुगु खः ।
पत्रकारतय्सं दोषीयात मज्वं धासें उगु भेलाया रिपोर्टिङ्ग बहिष्कार यायेगु घोषणा यासें लिहां वंगु खः। थ्व स्वयां न्ह्यः पत्रकारतय्सं उपप्रम एवं अर्थमन्त्री भरतमोहन अधिकारीयात बहिष्कार याःगु खः ।
