साउन २१ गते नेवाःतय् तःजिगु प्रदर्शन
येँ (सन्ध्या टाइम्स)/नेवाः स्वायत्त राज्य सुनिश्चित यायेत नेवाःतय्सं वइगु साउन २१ गते तःजिगु प्रदर्शन याइगु जूगु दु। म्हिगः च्वंगु नेवाः स्वायत्त राज्य मंकाः संघर्ष समितिया ग्वसालय् नेवाः जातीय खलः पुचःतय्गु भेलां उगु निर्णय याःगु खः। उगु ज्याझ्वः सतकय् प्रदर्शन जुइ वा सभा जुइ धइगु खँ धाःसा क्वःमछिउनि। ज्याझ्वः जातीय खलः पुचःतय्गु विशेष सक्रियताय् जुइ। विशेष यानाः भदौ १ गते संविधानया मस्यौदा तयार याइगु जूगुलिं उकियात हे लक्षित यानाः थ्व ज्याझ्वः यायेत्यंगु खः ।
आः झिंन्यान्हुया दुने नेवाः जातीय खलः पुचःया पहलय् नेवाः स्वायत्त राज्य, संघीयता नापं नेवाःतय्गु अधिकार बारे अन्तर्क्रिया अभियान नं न्ह्याकीगु जूगु दु। उगु अभियानया झ्वलय् नेवाः ल्याय्म्ह कवः नं दयेकीगु ग्वसाः दु ।
