म्वाःम्ह द्यः म्हसीकाः पूजा

कृष्ण प्रजापति

द्यः म्हसीकेगु लागिं आपालं मानव जातिं आपालं कुतः यायेधुंकूगु जुइमाः। अथे खःसां म्हो हे जक मनूतय्सं थःगु जीवनकालय् म्वाःम्ह द्यःयात साक्षत रुपं खंकाः पूजा याःगु दयेमाः। ख्वपय् छम्ह बैश वनेधुंकूम्ह मनुखं थज्याःगु हे अभियान चले यानाच्वनादीगु दु गुम्हेसिनं थः याकःचा जक मखुसें थम्हं पत्ता लगे यानागु म्वाःम्ह द्यःयात पुजा यायेगु प्रचार प्रसार यानाः छगू अभियान हे न्ह्याकाच्वंगु दु। वय्कः खः ख्वप वडा नं.-५ य् च्वंम्ह कृष्णराम चित्रकार।
वय्कलं ख्वपया फल्चा व देगलय् नं 'म्वाःम्ह सरस्वती मां खः मांयात पूजा या' धइगु नारा च्वयाः सकसितं धात्थेंयाम्ह मां म्हसीका बीगु अभियानय् न्ह्याका च्वनादीगु दु। थ्व ज्या वय्कलं निदँ न्ह्यवंनिसें न्ह्याकादीगु खः। थःगु हे छेँया लिक्कसं च्वंगु फल्चाया लिउने चिग्वःगु आखलं उगु नारा च्वयेवं मनूतय्सं थ्व ला बांलाःगु हे नारा खः, भचा तग्वःगु हे आखलं च्वयेमाल धइगु सुझाव बीगु याना हल। वय्कलं नं अथे हे तग्वः आखलं च्वयादिल। आः ख्वप वडा नं. ३ य् च्वंगु सलँ गणेद्यःया देगः लिउने नं वय्कलं अज्याःगु हे नारा च्वयादीगु दु ।

सार्वजनिक थासय् अथे च्वल धकाः वय्कःयात छक्वः वडा कार्यालयपाखें पं वःगु नं खः। तर थ्व छुं धर्म संस्कृतिलिसे सम्बन्धित वा राजनीतिक पार्टीया नारा मखुसें प्रत्येक मानवीय गुणया हे प्रतिनिधित्व याइगु नारा खः धासें स्थानीय मनूतय्सं समर्थन यासेंलि सुनां छुं याये मफुत। स्थानीय पसल्या सुरेन्द्रमान वासिंछ्याकं कनादी कथं आः वय्कः उगु ज्या यायेत पूर्ण रुपं स्वतन्त्र जुयादी छाय्धाःसा राजनीतिक पार्टीया नारा व पम्प्लेट तिकाः देगः फोहर याइगु स्वयां ला भिंगु सन्देशया नारा च्वनातःगु बांलागु हे खँ खः ।

वय्कः कृष्णराम चित्रकारं थज्याःगु नारा देगः फल्चाय् च्वयेगु यानादीगु धाःसा मखु। ताः ई तक थःत स्यनीम्ह द्यः सु खः धकाः मामं वंबलय् न्हापां मांया मुलय् च्वनेबलय् हे ज्ञान बीम्ह धइम्ह मां जूगु ल्याखं मांयात हे म्वाःम्ह सरस्वती खः धइगु प्रमाणित जुइवं हे तिनि थम्हं पत्ता लगे यानागु खँ मेपिंत नं इनेमाः धकाः भित्तेलेखन शुरु यानागु खँ वय्कलं कनादी। थ्व रुपचन्द्र बिष्टया 'थाहा' व विकाशानन्दया 'मनोक्रान्ति' स्वयां अलग हे कथं न्ह्यानाच्वंगु दु ।

कृष्णराम चित्रकारं म्वाःम्ह द्यः सरस्वती जक मखुसें प्रभू व ईश्वर नं पत्ता लगे यानाः थथे हे प्रचारय् हयेगु कुतः यानाच्वनादीगु दु। अथे खःसां आःयात मेमेगु नारा च्वयेगु मखुसें खालि थ्वहे मांयात हे म्वाःम्ह सरस्वती कथं पूया यायेगु अभियान जक न्ह्याकाच्वनादीगु दु। प्रकाश व भूमि दया हे विश्व सिर्जना जूगु ल्याखं प्रकाशया प्र व भूमिया भू मिले जुया प्रभू जूगु खः धयादीम्ह कृष्णरामं ताः ई तक ला थःपिं पुर्खौली पेशा पुं वा चित्र च्वयेगु ज्याय् हे संलग्न जुयादिल। थःगु जीवनया उत्तरार्धय् तिनि जक वय्कः थज्याःगु अनुभव यायेगु ज्याय् निरन्तर लगे जुयाच्वनादीगु खः। अथेहे ईश्वर पत्ता लगे याये धुनागु नं वय्कःया दावी दु। वय्कःया कथं ई अथे धइगु प्रारम्भ व श्वर अर्थात् न्ववायेगु हे ईश्वर खः। पसल्या व गनं छुं न्याः वनेगु इलय् व छुं चीज मालाः धाःवनेगु इलय् थःपिसं शुरु मयातलेया लागिं छुं प्रतिक्रिया व प्रारम्भ मजुइगु तर थःपिसं छुं याना क्यनेवं हे तिनि मेपिसं नं उकिया प्रतिक्रिया क्यनीगु ई श्वर हे ईश्वर अर्थात् द्यः खः। परमेश्वर धइगु नं अथेहे खः। पर अर्थात् मेपिंत ईश्वर कथं माने यात धाःसा हे जक थःत माने याइगु जुया मेपिंत थः प्रति आकर्षित यायेत स्वयेगु नं परमेश्वर खः ।

कृष्ण, बुद्ध व राम थेंज्याःपिं द्यःत मेपिंत माने याःगुलिं हे जक थः म्हसीकेत ताःलाःगु खः धइगु सीकादीम्ह चित्रकार कृष्णरामया वंगु जेठ ६ गतेनिसें २६ गते तक स्ववाःयंकं नेपाल आर्ट फाउण्डेशन नाफा हलय् पौभाः ब्वज्या नं जूगु दु। श्रेष्ठ व शुद्र जाति हे मनू जाति जूगु ल्याखं थः दुने हे थःत म्हसीके फुसा वहे द्यः खः धयादीम्ह वय्कः आः थःम्हं च्यादँ झिदँ बिकाः लुइकाम्ह ईश्वरया प्रचारयायेत नं प्रतिवद्ध जुयाच्वंगु दु ।

More Stories Like this