'सत्ताया बार्गेडिङय् कांग्रेसं’

येँ (झीगु स्वनिगः)

वर्तमान सरकारया नेतृत्व यानाच्वंगु नेकपा -एमाल)ेया वरिष्ठ न्वकु बामदेव गौतमं वइगु मंसीर १४ गतेया दुने न्ह्याथे यानाः जूसां नेपाःया न्हूगु संविधान जारी जुइ धकाः धयादीगु दु ।
प्रेस चौतरी दाङपाखें तुलसीपुरय् म्हिगः मंगलवाः ग्वसाःग्वःगु पत्रकार सम्मेलनय् एमालेया नेता गौतमं अथे धयादीगु खः । पुलांम्ह गृहमन्त्री वय्कलं मंसीर १४ गतेया दुने न्हूगु संविधान जारी याये मफत धाःसा नेपाः व नेपाःमितय्गु अस्तित्व हे समाप्त जुइ धकाः तकं दावी यानादिल । आःया अवस्थाय् एमाले दुने अन्तरविरोध दुसां न्हापाया तुलनाय् समाधन जुजुं अन्तरविरोध म्हो जुयाः वनाच्वंगु धैगु बांलानाः वनाच्वंगु खः धकाः तकं नेता गौतमं धयादिल । आःया अवस्थाय् नेपाली कांग्रेसं सेना समायोजनया विषययात न्ह्यःने तयाः सत्ताया नितिं बार्गेडिङ यानाच्वंगु खः धकाः तकं वय्कलं द्वपं बियादिल ।
सेना समायोजनया नितिं कांग्रेसं अडान तयेगु थें यानाच्वंसां बास्तवय् सत्ताया बार्गेडिङ हे यानाच्वंगु खः धकाः दावी यानादिसें नेता गौतमं अनावश्यक अडानं शान्ति प्रकृया व संविधान च्वयेगु ज्याय् पंगः थनाच्वंगु दु धकाः नं स्पष्ट यानादिल । संविधानसभाया दक्ले तःधंगु दल एकीकृत माओवादी दुने अन्तरविरोध दुसां उकिं यानाः शान्ति प्रक्रियाय् लिच्वः लाइमखु धकाः नं एमालेया बरिष्ठ न्वकु बामदेव गौतमं धयादिल । गौतमयात न्हापांनिसें माओवादीनाप लिक्क लाःम्ह नेता कथं नालाः वयाच्वंगु दु ।