इलय् हे बजेट हयेत कांग्रेस सहमत

येँ (झीगु स्वनिगः)

शान्ति प्रक्रिया नापं न्यागू बुँदाया सहमति कार्यान्वयन मजुइकं बजेट हयेके बिइगु जुइमखु धकाः अडान कयाः वयाच्वंगु नेपाली कांग्रेस अन्तिम इलय् वयाः लचकता क्यंगु दुसा आः इलय् हे न्हूगु बजेट वइगु जूगु दु । म्हिगः मंगलवाः अर्थमन्त्री भरतमोहन अधिकारी, गृहसचिव व अर्थ सचिवलिसे सहलहया झ्वलय् कांग्रेसया नेतातय्सं इलय् हे बजेट हयेत सहमति जूगु खः । कांग्रेसया नेता लक्ष्मण धिमिरें धयादिल 'शान्ति प्रकृयाया अडान छगू पाटो खः, बजेट मेगु खँ खः ।'कांग्रेसं तयागु प्री बजेट हयेत नं सरकार तयार जूगुलिं सहमति जूगु खः धकाः वय्कलं संचारकर्मीतय्त धयादिल । बजेट निर्माणया ज्याय् कांग्रेसयात नं दुथ्याकेगु धकाः सरकारं प्रस्ताव तयेवं कांग्रेस सहमति जूगु खः । कांग्रेसयात बजेट हयेगु सवालय् सहमति याकेत अर्थमन्त्री नापं अर्थ सचिव तःन्हु न्ह्यवंनिसें हे यक्व हे ब्वाँय् जयादीगु खः । अर्थमन्त्री भरतमोहन अधिकारीं धयादिल 'बजेटबारे प्रमुख प्रतिपक्षी नेपाली कांग्रेसनापं सहमति ब्वलने धुंकूगु जुयाः असार मसान्त तकया दुने न्हूगु बजेट वइ ।'

वय्कलं रोजगारी अप्वयेकेगु, स्वंगू थांया अर्थनीति, कृषि, स्वास्थ्य, शिक्षा, पर्यटन व उर्जायात प्राथमिकता बियाः बजेट हयेगु तयारी जुयाच्वंगु दु धकाः नं जानकारी बियादिल । प्रधानमन्त्री झलनाथ खनालं सभासद् व थीथी संगठनया नामय् करोडौं तकाया कटौटी बजेत हयेगु जुइ धकाः जानकारी बयादीगु दु । व्यवस्थापिक संसदय् वइगु बुधवाः हे प्री बजेटया नितिं सहलह ब्याकेगु नापं असार २९ गते बजेट हयेगु तयारी आः सरकारं पूरा याइगु जूगु दु । लागातार स्वदँतक इलय् हे बजेट मवःगुलिं थुगुसी उकियात त्वाःथलाः इलय् हे बजेट हइगु जूगु दु । संविधानसभाया चुनावलिपा लगातार इलय् हे् बजेट हये मफयाच्वंगु खः । थुगुसी वर्तमान सरकारं लगातार रुपं मेहनत यानाः इलय् हे बजेट हयेगु तयारी याःगु खः ।