पूँजी पलायन पनेमाल

नेपाःथेंयाःगु अतिम्हो विकसित देशं दच्छिया म्होनिं ३४ अर्ब ध्यबा अवैधरुपं पिहां वनाच्वंगु दु । अवैधरुपं ध्यबा पिहां वनीगु न्हापांगु थासय् लाःगु वंगलादेशं दकले अप्वः अवैधरुपं ध्यबा पिहां वनाच्वंगु खः । थुया लिपा छसीकथं अंगोला, लेसोथो, चाड व यमन देय् लाः । वंगु मे महिनां टर्किया राजधानी इस्तानबुलय् जूगु अतिकम विकसित देय्तय्गु सम्मेलनय् न्ह्यब्वःगु तथ्यांकं थ्व खँ पिहांवःगु खः । नेपालं अवैध तरिकां ध्यबा पिहां वनाच्वंगु खँ अप्वःस्यां स्यूसां नं थ्व खँ उलि सार्वजनिक मजूगु खः । अथ्यला सन् १९९० सालंनिसें संयुक्त राष्ट्र संघंया युएनडिपी पूँजी पलायन विषययात कयाः अध्ययन अनुसन्धान न्ह्याकूगु खः । शुरुइ थ्व ल्याः उलि अजूगतिया मजूसां दँय् दँसं अप्वः जुजुं वनाच्वंगु खँ म्हो विकसित देय्या अर्थ विद्तय्त गम्भीर यानाव्यूगु दु । सन् १९९० निसें सन् २००८ तक्क झिच्यादँया अध्ययन अनुसन्धानकथं विश्वया करीव ४२ गू राष्ट्रय् पूँजीपलायन अप्वः जुजुं वनाच्वंगु दु । उगु झिंच्यादँया दुने म्होनिं खुगू खर्व, न्यय्गू अर्ब ध्यबा विदेशय् पिहावंगु खः । थ्व ध्यबा पिहां मवंसा आर्थिकरुपं गुलि देय्यात ग्वाहालि जुइगु खः व ग्वाहालि मदैगु जूगु दु ।

देशय् आर्थिक अवस्था उत्साहप्रद मजू । छुं दँ न्ह्यः तक्क खाद्यान्न निकासी यानाः विदेशी मुद्रा कमय् याइगु नेपालं आः वयाः खाद्यान्न आयात यायेमाःगु अवस्था वःगु दु । उद्योग व्यापार प्यख्यरं सन्तोषजनक ढंगं विकास मजूगु व जुइ मफूगु अवस्थाय् देय् दुनेया पूँजी नं थुगुहे कथं पलायन जुजुं वन धाःसा भावी देशया अर्थतन्त्रया नितिं तसकं चिउताःया विषय जूगु दु । बैंकय् ध्यबा तयेवलय् उकिया श्रोत क्यनेमाःगु नीतियात राज्यं नालाकाःगु दु । अथ्य हे छेँ बुँ न्यायेवलय् नं आय आर्जनया श्रोत क्यनेमाःगु प्रावधानयात छ्यलावुलाय् हयेवं पूँजी पलायन तिव्ररुपं जूगु अनुमान याःगु दु । थ्व वाहेक देशय् पूँजीया सुरक्षा उलि बांलाक जुइमफयेवं पूँजी पलायन अज्ज अप्वइगु धाःगु दु । नेपाःथें याःगु कम विकसित देशया पूँजी पलायन जुइगु धयागु आन्तरिक श्रोत साधनया समस्या म्हो जुइगु खः । उत्पादन मूलक क्षेत्रयात कमजोर यायेगु खः । वंगु स्वदँया दुने छुं क्षेत्रया विकास जूगु दुसा व खः भ्रष्टाचार । भ्रष्टाचारया अत्याधिक विकासं देय् जर्जर जुइधुंकूगु दुसा थुकियात न्यूनकरणयानाः पूर्णत अन्त यायेगु नितिं सरकार नं क्वातूगु व वल्लाःगु हे माः । सरकार बल्लाःसा जक पलायन जुयाच्वंगु पूँजी पनेगुया लिसे भ्रष्टाचारयात नं निर्मूल यायेफै । ध्यबा अवैधरुप पितछ्वयेगुली सरकारी जागीर नया च्वंपिं अप्वः दु । अवैधरुपं ध्यबा पित छ्वये न्ह्यःहे राज्य उज्वःगु सम्पत्तिइ ध्यान वियाः थःगु नियन्त्रणय् तये फयेमाः ।

More Stories Like this