गोलीं कयेकूपिंत कारबाही यायेगु नितिं इनाप

येँ (झीगु स्वनिगः)

उपप्रधान लिसे गृहमन्त्री कृष्णबहादुर महरालिसे वैदेशिक रोजगार व्यवसायी संघया प्रतिनिधितय्सं मंगलबाः सनिलय् गृहमन्त्रालयसं नापलानादीगु दु । उगु नापलाये ज्याय् सोमबाः लाजिम्पातस्थित म्यानपावर ज्याकुथिइ जूगु गोली काण्डया बारे केन्दि्रत जूगु खः । व्यवसायी संघया प्रतिनिधितय्सं गोलीं कयेकूपिं मनूत म्हसीका कारबाही यायेत माग याःगु दु । राज्यया आर्थिक मेरुदण्डया रुपय् पलिस्था जूगु वैदेशिक रोजगार व्यवसायलय् असुरक्षा जूगु बिचाः प्वंकूगु खः ।

उमिसं वैदेशिक रोजगारयात राज्यं सुरक्षा बिइमाःगु बिचाः तःगु खः । उमिसं गोलीं कयेकूगु व मोटरसाईकलय् बिस्युं वंगु लू सिसि टिभीइ दुगु जूसां नं छानबिन जुइमफुगु धासें च्यूताः प्वंकूगु दु । लिसलय् गृहमन्त्री महरां राज्यं वैदेशिक रोजगारयात प्रबर्द्धन व प्रोत्साहन यायेगुपाखे न्ह्यःज्यानाच्वंगु बिचाः तयादिल । वय्कलं राज्यं वैदेशिक रोजगार व्यवसाययात ध्यान मब्यूगु जकं खःकि धइगु शंका मयायेत इनाप यानादिल । लाजिम्पातस्थित म्यानपावर ज्याकुथिइ जूगु गोली काण्डया बारे छानबिन यायेत राज्यया फुक्क सुरक्षा अंग न्ह्यःज्यानाच्वंगु जानकारी बियादिसें गोली कयेकूपिंत याकनं ज्वनीगु धयादिल । वय्कलं दोषीयात सरकारं कडा कारबाही यायेगु प्रतिबद्धता नापं प्वंकादिल ।