इलय् हे सर्वसम्मतया बजेट हयेगु जुइ : खनाल

येँ (झीगु स्वनिगः)

प्रधानमन्त्री झलनाथ खनालं इलय् हे सर्वसम्मतीय बजेट हयेगु धयादिल । वंगु निदा/स्वदानिसें इलय् बजेट हयेमफुगु न्ह्यःथनादिसें फुक्कसिया सहमतिइ संसदीय प्रकृया कथं बजेट हयेत्यंगु नं वय्कलं स्पष्ट यानादिल । एमाले संसदीय दलया बैठकय् न्वंवानादिसें प्रधानमन्त्री खनालं फुक्क दलया सहमतिइ समावेशी कथंया बजेट हयेगु तयारी यानाच्वंगु जानकारी बियादीगु खः । थुगुसी फुक्कसिया सहमतिइ राष्ट्रपतिं नीति लिसे ज्याझ्वः न्ह्यःब्वयेधुंकाः संसदीय प्रकृया कथं हे बजेट न्ह्यःब्वइगु प्रधानमन्त्री खनालया धापू खः । उगु हे बैठकय् अर्थमन्त्री भरतमोहन अधिकारीं लगानी अप्वयेकेगु कथंया बजेट हयेगु तयारी जुयाच्वंगु जानकारी बियादिसें उकिया नितिं फुक्क पक्षलिसे सहलह न्ह्यानाच्वंगु नापं न्ह्यःथनादीगु खः । राजनीतिक दलतदथुइ सहमति मजुयाः संविधानसभाया निर्वाचनलिपा छु नं दाय् इलय् बजेट न्ह्यःब्वयेफूगु मदुनि । इलय् बजेट न्ह्यःब्वये मफयाः देय्या आर्थिक गतिविधिइ नकरात्मक लिच्वः लाइगु नापं विकास निर्माणया ज्यात नं जुइमफुगु न्ह्यःथनादीगु खः ।