सोथेबीजय् नेपाःया पौभाःपाखें न्हूगु रेकर्ड
लण्डनय् च्वंगु सोथेबीज लिलाम बजारय् नेपाःया पौभाःपाखें दक्षिण एसियाली देय्तय् चित्रकलाय् न्हूगु रेकर्ड कायम याःगु दु । वंगु जुन १ तारिख कुन्हु विश्वया प्यंगूगु पुलांगु लिलाम बजार सोथेबीजय् झिंप्यंगू शताब्दीया नेपाःया 'बसुधारा मण्डला' ८ लख, २५ हजार, निसः व न्यय्गू पाउण्ड (९ करोड ६५ लख)य् लिलाम जुयाः न्हूगु रेकर्ड कायम यायेत ताः लाःगु खः ।
बसुधारा मण्डला जुजु जय अर्जुना देव(१३५१-१३८२)या पालय् सन् १३६५सं कलाकार जसराजा जिरिलां च्वयादीगु खः । पौभाः दुने कलाकार जिरिलां थःगु ल्हाःचिं नापं मिति नं उल्लेख यानातःगुलिं थुकियात नेपाःया हे न्हापांगु मिति उल्लेख यानातःगु पौभाः कथं कयातःगु दु । जिरिलाया बारे आपालं इतिहास मदुसां वय्कःया चित्रकलायात स्वनिगः दुनेया पुलांगु हिन्दु व बौद्धतय् उतकृष्ट व महत्वपूर्ण चित्रकला कथं कायेगु याः ।
नेवाः बौद्धमार्गी द्यः बसुधारायात दथुइ तयातःगु पौभालय् थीथी संस्कार, परम्परागत बाजं व प्याखँत च्वयातःगु दु । थुगु पौभाः लिपा हे नेवाःतय् पौभाः चीन लगायत देशय् तकं प्रसिद्ध जूगु खँ इतिहासय् न्ह्यथनातःगु दु ।
उगु पौभाः हार्वाड विश्वविद्यालयया विद्वान स्टुअर्ट केरी वेल्चया 'भारत व इस्लामिक चित्रकला संग्रह'लय् तयातःगु खः । बसुधारा मण्डलां न्हूगु रेकर्ड कायम यायेवं लिलाम यानाः मुंकूगु वेल्चया मुंक्क संग्रहया ध्यबा ८ मिलियन पाउण्डं अप्व जुयाः नीगुंगू मिलियन पाउण्ड थ्यंगु दु । सन् २००८य् वेल्च मदयेधुंकाः वय्कलं मुंकातःगु दक्षिण एसियाली देय्तय् चित्रकला हार्वड विश्वविद्यालययात लःल्हाःगु खः । लिपा विश्वविद्यलायं उगु चित्रकलात छगू लिपा मेगू लिलाम यानाः मीगु सुरु याःगु खः ।
More Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
